Penusah angus ketiga nyadi kandang seminggu

SIBU: Sepenyampau 161 iku peranak Rumah Umpang Ulu Bauh Celon Selangau ditu nadai endur diau agi pengudah karam di darat malam tadi.

Nitih ku penerang Penulung Direktor Operasyen Opis Bomba enggau Penyah Penusah Sarawak, Tiong Ling Hii, 25 pintu bilik rumah panjai nya angus lengis.

Nengah penerang berita, iya madahka 11 raban sida diketuaika PBK II Mclean C Madis ngesah ngagai endur penusah nyadi ngena sebuah FRT enggau entukar 4WD pengudah dipadah pasal penusah urung pukul 9.59 malam.

“Raban Bomba nengah jalai sekut penyauh 5 km ngelawa endur penusah tang lebuh datai dia api endang udah ngagus kesemua rumah panjai nya.

“Ai ari anak sungai besemak udah dikena ba operasyen ngerara lalu api mujur dirara urung pukul 3.05 dini hari,” ku iya.

Ku iya, nasit amat nadai sebarang penusah bakal tauka bebadi nyawa diripot laban semua peranak mujur ngelarika diri.

ANGUS LENGIS… Raban bomba kiruh ngerara api ti ngaguska Rumah Umpang Ulu Bauh Celon Selangau malam kemari.