MIRI: Komuniti Long Lama meri langgur penemu jematan baru dipenyadi ti meraka Batang Baram tu ngangkatka nama ex-Kepala Menteri Sarawak, niang Pehin Seri Adenan Satem.

“Kami dekaka jematan 573 meter pemanjai tu ngangkatka nama niang Tok Nan laban jematan tu nyadi nyata asil ari pengeran niang gawa ngemansangka menua tu,” ku Adun Telang Usan, Dennis Ngau.

Dennis mansutka jaku tu lebuh dirandau ba pengawa bejadika jematan di Long Lama, pagi tadi.

Jematan beungkus lebih RM67 juta dipelanja Perintah Sarawak udah ulih ditengah mensia mayuh.

Sebedau jalai berengkah digaga dalam taun 2016, peranak ditu begunaka servis feri ngelayang Batang Baram ngelawa Long Lama urung sejam setengah ari Miri, sereta mansa kandang menua Apoh enggau Tutoh kenyau ari taun 2002.

NGERUMBAN PEMANSANG… Dennis Ngau (tengah) lebuh bejadika pengawa ngelanchar projek ngaga jematan ditu, pagi kemari.

“Peranak Long Lama, Apuh enggau Tutoh ngena perau ngelayang sungai sebedau servis feri bisi disedia.

“Pemisi jematan tu deka meri pemaik ngagai komuniti ditu,” ku Dennis.

Ku Dennis, penembu jematan tu ila deka dipenyadi Kepala Menteri Sarawak Datuk Patinggi Abang Johari Tun Openg diperambu dalam bulan Jun taun tu.

“Kitai sehari tu deka nempa turai, tanda baru menua di Long Lama lalu aku ngasaika jematan tu ulih nyungkak ekonomi rama kitai ditu,” ku iya madah nyemetak.

Ku iya, Long Lama bisi peluang besai ba pemansang perengka pengangkut sereta pengawa betanam betupi.

“Sekeda ari perambu pemansang ditu iya nya kupi ‘Tongkat Ali’ lalu aku andal penembu jematan ulih ngemai pemujur ba pengawa tu jemah kelimpah ari pengawa numbuhka Palan Ngumpul, Nginjin enggau Nungkus (CPPC) ti udah dikementar,” ku iya nerang silik seraya nambah, jematan nya diatu benung digaga.

Iya mega ngelalau peranak Long Lama ngetanka kaul penyerakup enggau pangan diri sereta meri sukung tegut ngagai perintah Sarawak.

“Seagi kitai beserakup enggau meri sukung tegut ngagai GPS sereta parti ke bukai, kitai deka bisi peluang mansang dudi hari,” ku Dennis nandu.

Sama datai Sekretari Politik Kepala Menteri Charles Balan Selin, Robert Ayu, Temenggong Elizabeth Ding, Pemesai Pelilih Telang Usan Baru Tai enggau bala ketuai raban bansa sereta urung 500 iku peranak diau ngelingi dia.

NYAGA PENGELIKUN… Dennis (dua kiba) meri lalau ngagai sida ti betengahka jalai alun ke nengah jematan.