KUCHING: Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah madah geran RM1 juta udah dikemendar ungkup 200 iku indu ti deka nyadi pedagang di Sarawak.

Sebedau tu sida udah ngagihka belanja penyampau RM500,000 dalam taun 2018 nyadika puku dikena orang indu ngepunka dagang sida nengah geran pedagang Opis Orang Indu enggau Ruang Bilik Sarawak (JWKS).

“Nengah geran diberika kitai sebedau tu udah meri mayuh pemaik ngagai 100 pedagang indu ari selampur Sarawak.

“Ari geran besai agi penyampau diberi taun tu dikearap matak mayuh agi pedagang indu mansang ba dagang sida empu,” ku iya.

Teks jaku iya dibacha Menteri Muda Orang Indu, Ruang Bilik enggau Pemansang Anak Mit Rosey Yunus rambau pengawa nutup Program ‘Women Empowerment: Be Gorgeous ditu kemari.

KENANG… Rosey Yunus begambar ungkup kenang begulai enggau bala penyereta program nyerumba pengawa nutup Women Empowerment: Be Gorgeous Programme kemari.

Ku Fatimah nambah, dagang online mega udah mayuh gawaka pemansang ti setipak enggau pengawa ngenegapka pedagang indu di menua tu.

“Nya alai nengah aplikasyen ePrenuers Wanita ti udah dilancharka kitai bulan nyin tadi nyerumba Pengerami Ngintu Hari Orang Indu Entarabansa dikearap nyadi pelasar mantu raban pedagang indu ngelaku enggau nyual produk sida nengah online.

“Pemisi ePrenuers Wanita tu mega orang indu dikearap ulih ngerembaika rentayan dagang ke bisi diatu ngagai tikas tinggi agi ba renggat entarabansa.

“Perintah semampai keran meransang kaul orang indu ba pengawa dagang nengah genap pengawa dipejalai dikena ngemansangka diri ba pengawa dikereja sida,” ku iya nampung.

Pia mega ku Fatimah, ba atur program dua hari berunggu tu bala penyereta udah ngiri penemu enggau diperansang nengah bengkel enggau randau bekunsika peneleba sida lebuhka bedagang.

“Bala penyereta program mega dikeandal ulih nemu pengulih enggau nyapai juluk ba dagang sereta nyungkak ekonomi ruang bilik sida.”

Fatimah mega ngarapka opis menteri iya ulih ngemai pemansang sebela ngagai dua pekara ti nyadi tiang pemun penegap orang indu iya nya batang kereja enggau ruang bilik.

Lebih 150 penyereta ngarika Gempung Ukai Dikuasa Perintah (NGO), bala pengari opis enggau ejensi sereta bala pedagang JWKS empu datai ngulu program nya.