MALUDAM: Perintah Sarawak ukai deka minta puji mantu ngemansang sereta ngadu baru sekula repuk ba menua tu.

Kepala Menteri, Datuk Patinggi Abang Johari Tun Openg madah Perintah Sarawak ukai deka minta puji, tang tu endang pekara ti patut ditulung sida.

“Perintah Sarawak endang enggau lurus ati deka mantu pemayuh sekula repuk ba menua tu laban nya endang tanggungpengawa kami sereta bala nembiak sekula patut bisi palan ti manah alai belajar.

“Ukai ketegal kami enda nerima bantu perintah besai, tang enti sema sida enda ulih mantu tauka nadai chukup agih belanja, sida patut minjau ngambika enda ngasaka ati,” ku iya madah

Abang Johari madah nya ba pengawa bejadika Pengerami Nasih Tanah Projek Rayat ba Kampung Maludam Fasa 1, kemari.

UNGKUP RAYAT…. Datuk Pating Abang Johari Tun Openg (tengah) ngemata pengawa nyuaka dokumen tinda projek ngagai siku konterikta ke udah dipilih rambau pengerami ke diatur ba Maludam tadi.

Rambau pengawa nya, iya madah perintah Sarawak kala deka meri pinjau RM1 bilion ngagai perintah besai ngambika ulih neruska pengawa ngadu baru sekula repuk di menua tu.

“Tang sida enda nerima langgur penemu baka dipadah kami nya laban sida bisi ati ti enda ulih nerima penemu orang bukai (ngelawa diri).

“Nya alai, kami (Perintah Sarawak) mansutka agih belanja RM 30 juta dikena ngadu baru pendiau sekula ba menua Maludam tu,” ku iya.

Nangkanka nya, Abang Johari madah projek ngaga sekula tu siti ari projek Opis Pelajar Nengeri Sarawak (JPNS).

“Ketegal nya projek ngaga sekula endang tanggungpengawa perintah besai.

“Tang pengudah perintah betukar taun nyin kemari, mayuh agih belanja enda nyadi diberi,” ku iya nambah.