SARIKEI: Mensia mayuh dilalau enda ngena media rama ngerembaika gambar tauka penerang bula pasal penusah tanah berenyang.

Ketuai Opis Bomba Sarikei, Mahmudin Narudin madahka ulah sekeda raban naburka penerang bula pasal penusah ngenyit nya ngasuh mensia mayuh kesal ati.

Ku iya, mensia mayuh patut dulu agi nentuka pengamat sebedau bekunsi tauka ngerembaika penerang nya nengah media rama.

“Anang naburka sebarang penerang ti agi rapas tauka bedau temu pengamat iya. Kitai enggaika mensia mayuh berasai nangi.

“Sida mega tau telefon ngagai kami tauka sebarang ejensi bekaul nentuka pengamat,” ku iya madah ngagai Suara Sarawak.

NERANG… Mahmudin meri penerang ba mua mayuh pasal chara nagang penusah angus di JKR Sarikei.

Ngelansa pasal siti ripot penusah tanah berenyang ti ditabur ba media rama kemari, ku Mahmudin, sida nadai nerima sebarang ripot pasal pekara nya.

Iya nyemetak madah, ulah ngerembaika penerang tauka gambar pelesu tau ngujungka orang nya ditan enggau didawa Komiti Komunikasyen Enggau Multimedia Malaysia (SKMM) nitihka Seksyen 233 (1) Akta Komunikasi dan Multimedia 1998.

“Enda ibuh kiruh ngerembaika penerang enti bedau temu pengamat,” ku iya.

Kemari Opis Pengemata Gaya Hari Malaysia Pampang Sarawak lebuh dirandau Suara Sarawak ngenggaika penerang penusah tanah berenyang bisi nyadi di Sarikei.

Pengari ejensi nya madahka sida nadai nerima sebarang ripot tauka rikod bekaul enggau penusah nya.

Dulu ari nya, sebengkah portal nengah media rama Facebook ngeripot tanah berenyang 3.8 magnitud enggau 10 kilometer penalam, nyadi urung 5.00 pagi di bagi menua nya.

“Mensia mayuh semina belalauka penerang ari ejensi tauka opis bekaul ti udah dilempai pangku pengawa ba sebarang isu sekalika ba renggat pelilih menua tauka nengeri, enti deka nemu sebarang penerang pasal penusah ngenyit,” ku iya nandu.

KENANG… Mahmudin begambar ungkup kenang begulai enggau bala staf JKR Sarikei pengudah tembu licha.