KUCHING: Ketegal beambis ati deka niri ke rumah tangga enggau siku orang ke baru dikelala ari Facebook, dia siku lelaki ari Sibu, 28 taun rugi RM60,000.

Ketuai Opis Pansik Penyalah Komersial Polis Sarawak, Supt. Mustafa Kamal Gani Abdullah madahka lelaki ti gawa perintah tu bansa Melayu tepejuh enggau penyayau bula lebuh ti bekelala enggau siku indu ti benama ‘Aishah’ kenyau ari bulan November 2017.

“Udah nya seduai lalu berandau nengah Whatsapp ngujungka iya mutus ati mai Aishah jadi. Indu nya lalu setuju jadi enggau iya, tang ngasuh lelaki nya dulu meri duit nyadika ‘wang hantaran’.

“Kenyau ari nya, lelaki nya diasuh meri duit beberapa kali nengah beberapa ‘transaksi’ penyampau semua RM60,000 atas nama siti akaun orang ti enda dikelala iya ari bulan November 2017 nyentuk ke April taun tu,” ku Mustafa.

Pia mega, duit ti dianjung lelaki nya asil ari duit pinjau ba sebuah bank. Iya nemu diri kena tipu sepengudah meda sulu Facebook iya nya enda ulih digiga agi.

Mensia mayuh dilalau sekali agi ngambika bejimat lebuh ti bekelala enggau orang ba media rama. Mayuh kes nipu ngena penyayau bula tu, anang jampat pechaya enggau orang ke baru dikelala sereta empai kala enggau betemu mua laban chukup nyamai sida ngelari diri pengudah bulih duit ari orang ke ditipu.

NGASAKA ATI…Gambar profil ti dikena Aishah nipu.