Jauh pejalai mayuh ga utai ditengah enggau dipeda. Dunya gelima artis enda semua manis baka ti sangka. Orang ti meda amat baka ti gelima tang semina sida ke begelar artis aja nemu pekara ti bendar.

Sebedau enggau pengudah tebilang, artis dulu nempuh mayuh macham penguji. Besemekih enggau kaban artis empu, nerima jaku pejah, penanggul ba rumah tangga enggau pengeribat ba penanggul pengidup diri entara pemar ti selalu ditapi artis kitai.

Pemar ke bukai nyengkaum kaul enggau peminat, sengki penemu enggau kompeni rikoding enggau pemujur lagu tauka album sida.

Ngetanka pengelaku diri ba dunya pemerindang ukai pengawa ke mudah. Kaul, disiplin, pendiau, album enggau lagu nya sekeda ari pekara ti ulih nyaup ngetanka pengelaku nya.

Raban Search ke pemadu iya tebilang enggau lagu Isabella urung taun 1989 suba pan diatu udah tengelam ketegal nadai lagu enggau album baru.

LANDIK BEJAKU… Kelimpah landik belagu, DJ Ivy mega ngembuan pengawa tetap nyadi pengeluar program ba Catfm.

Baka nya mega artis kitai Iban ke dulu suba tebilang ba serata menua diatu pan nadai tentu temu rita. Tentu bisi kebuah? Laban pengelaku tau datai lalu tau mega lenyau sebarang ba maya.

Ngelansa aktiviti seni

Pengeluar program @ DJ Ivy Ubang berengkah gawa ba opis radio Kenyalang (diatu Catsfm) dalam taun 1996.

Sebedau nya iya udah kala gawa nyadi waitress, cashier, kerani enggau menijar pub. Ada di Kemunting Taiping Perak, DJ Ivy ngembuan peneleba begulai enggau mayuh orang; bansa ukai baka China, Melayu enggau India. Nya siti ari kredit iya lalu enda alit ati lebuh maya iya gawa ba Radio Kenyalang suba iya mega gawa nyadi DJ ba bagi Melayu.

“Mayuh pengawa udah diasaika aku. Pait manis ba sebengkah-sebengkah pengawa enda ngelemika ati aku tang ngajar aku reti idup. Aku mega kala gawa ba MD Publication, nyadi pengarang buletin Kenyalang; siti buletin pemerindang dalam jaku Iban.

PENGINGAT…Gambar kenang DJ Ivy ba sebengkah pengerami Wonderful Indonesia di Kalimantan ba taun nyin kemari.

Album keterubah – Ambai Lalai

Sekumbang ke nyadi artis, DJ Ivy udah kala ngerikod tiga iti album. Album ti keterubah nya Ambai Lalai lalu lagu Ambai Lalai nya mega nyadi siti ari lagu hits iya. Nangkanka album nya, DJ Ivy terus ngerikod album ti kedua, Bujang Tangkai Ati lalu iya ti ketiga (ke pemadu baru) Ati Rajai dalam taun 2017 tu tadi.

Kelimpah ari album solo, DJ Ivy bisi mega ngerikod lagu kediri iya begulai enggau kompeni enggau komposer bukai.

Siti ari lagu ti chukup badas dirikod iya ba Ranyai Sound Studio nya Menyati. Klip video Menyati ulih dipeda ba youtube. Entara komposer ti kala ngaga ke iya lagu nya David Till, Andrewson Ngalai, Jenarino Jeraki, Al-Quaz Jackie, Yazit, Tony Engkabi sereta enggau mayuh agi ke bukai.

Ba Gina Production Studio Miri DJ Ivy kala mega ngerikod dua iti lagu iya nya Pegi Mih Sulu enggau Anang Ngayahka Aku. Nambahka nya, ba Vincent Geruna Production, iya mega kala ngerikod dua iti lagu, Aram Ngabang lalu Anang Enda Pulai Begawai begulai enggau GPS.

BALA BAKIH…DJ Ivy (kanan) begulai enggau dua bakih ke sama enggau iya gawa ba Catfm iya nya Dj Maxwell Franklin Saran (kiba) enggau DJ Mathew Abu.

Nyadi pelakun telemovie – Os Anak Tarzan

Kelimpah ari batang pengawa iya nyadi pengeluar program / DJ ba Catsfm, DJ Ivy suah diambi orang merindang (belagu) enda milih endur di serata Sarawak. Nambahka nya DJ Ivy dulu suba mega kala dibai orang belakun ba telemovie Os Anak Tarzan.

Dalam kandang bulan Mei tu ila, DJ Ivy bisi udah disemaya nyadi emcee ba sekeda pengeramai.

“Kena 11 Mei aku diambi orang nyadi emcee ba Hotel Kuching Park. 17, 18 enggau 19 Mei aku mega diambi orang ba pengerami Gawai Tikas Menua di Bintulu.

Ba pengerami nya Raban Ngepan Iban bisi ngatur siti pekit pasal pekayan enggau kereban ngepan asal kitai Iban. Pengawa bejadika album baru penanyi NK Yongai, aku mega udah dipadahka diatu”, ku DJ Ivy bekunsika sekeda tanggungpengawa ungkup iya ti deka datai.

MERUAN REGAS…Dedini pengerami, nyema bisi dikanggau nyadi emcee Ivy naka ulih nyaup nitihka peminta tuai pengatur pengerami.

Lalau nuju semua

Ba industri pemerindang kitai patut megai penemu ti seruran deka begulai sejalai enggau pangan diri.

Kitai mega patut bechuntoka orang ti lebih tuai sereta lebih mujur ari kitai.

“Anang enggai betanyaka sebarang penemu ari pangan diri. Enggau enda ngira umur diri, kitai tetap bisi pengurang enggau pengelebih.

“Enti nuan ngasai diri bisi pengelebih anang ga bangat sumbung lalu enti ngasaika diri bisi penimpang anang mega kelalu ngemaruhka diri. Begulai mih enggau orang ti badas,” ku DJ Ivy ngelalau.

ALBUM KEDUA…Bujang Tangkai Ati nama album kedua DJ Ivy.

Mayuh udah dipeda ba media sosial artis ke tuai agi gerah ati bekunsika peneleba enggau artis baru ba semua pekara ti tau nyadi ke lalau. Gerah ati enggau enda semina bekiraka diri empu aja nya siti ati pengawa ti chukup badas dikena kitai begulai sejalai ba industri pemerindang.

Penguji ulih diseliah enggau pengasih ti tuchi beresi

DJ Ivy ke mayuh udah ngangkatka artis lama enggau artis baru nengah program radio iya. DJ ivy ngasaika industri pemerindang di Sarawak deka mansang badas enti sema semua artis sama besukung betulung enggau pangan diri.

“Terima kasih ngagai surat kabar Suara Sarawak laban udah meri aku peluang ayan ditu. Terima kasih mega kaban artis, peminat, dj radio, raban pemberita enggau semua ti meruan meransang aku ba pengawa merindang.

“Enda tinggal mega ngagai kami sebilik enggau semua ti enda ulih sebut aku ditu magang”, ku DJ Ivy ke meruan regas sereta manis dipeda mata.

Kitai arapka DJ Ivy meruan gerai, lantang sereta ngembuan ati rindu ti enda nemu badu ba dunya pemerindang. Semua penguji tetap ulih diseliah ke tisi enti kitai semampai beseruanka pengerindu enggau pengasih ti tuchi beresi.