IGAN: Penguna feri ditu tebelengga enda lama tepedaka dua iku baya berekak semak penyangkai feri nya, kemari.

Udah nya, baya lebih lima meter pemanjai nya dipeda nyipat ai lalu beranyut ke ulu sungai lalu nengelamka diri pengudah feri ngerambing tebing.

Nitih ku siku penguna feri, Aziz Julaihi, 44 taun, sebedau tu mega sida suah meda baya ngayanka ba mua ai nya kelebih agi maya ai pasang.

“Baya tu suah amat ngayanka diri besemak enggau feri ti dikena peranak menua tu ngelayang Batang Igan ti deka ngelawa menua Matu tauka Mukah.

“Baka nya mega baya ke dipeda kami kemari tang sekali tu bisi dua iku sereta besai amat. Ngasuh bala kami ditu begau,” ku iya lebuh dirandau Suara Sarawak.

Ku Aziz, raban berikan menua nya mega irauka pengelikun diri lebuh ngiga rejeki dia laban baya nya dipeda mangah amat.

“Kami ditu mega suah meda baya ke bebesai ngeradai diri ba tebing sungai maya ai surut.

“Baya ke suah ngayanka diri besemak feri tu endang ukai pekara ke baru lalu baya tu baka ke enda nangika mensia.

“Nya kebuah aku ngansak raban bekuasa bekaul bejalaika pengawa matau dikena nyeliah sebarang penusah enda disadang nyadi,” ku iya madah nyemetak.