MALUDAM: Perintah Nengeri ngembuan juluk deka ngemansangka menua Maludam ngena chara moden seriris enggau pemansang kemaya hari.

Kepala Menteri Datuk Patinggi (Dr) Abang Johari Tun Openg madah dikena nyapai juluk nya dia perintah ngemujurka Projek Rayat Skim Nangkir Kampung Maludam Fasa 1 lalu ungkus semua projek deka ditanggung perintah.

“Semua ungkus deka ditanggung perintah nyengkaum pengawa nimbuk tanah, ngaga jalai raya ke menyana enggau sistem entali ai besimen mungkur bekal kuasa karan dikena ngurangka tating belanja rayat ditu.

“Tu mandangka perintah nengeri endang bebendar deka ngemansangka kandang menua pesisir di nengeri tu.

“Kitai ngembuan mayuh perambu pemansang enggau perengka guna moden ungkup rayat di menua pesisir. Kebuah pia laban kitai deka meri pemansang di pesisir sebaka enggau pemansang diasai rayat di kandang mengeri,” ku iya.

Iya madah munyi nya rambau Pengerami Nasih Tanah Projek Rayat Skim Nangkir Kampung Maludam Fasa I enggau Masjid Baru Maludam ditu kemari.

Nangkan nya, Abang Johari madah pemenggi tanah mega semina dipinta mayar premium tanah penyampau RM2,500 dibanding RM5,000 iya nya penyampau ke ditetap sebedau tu.

Berebak enggau nya, iya deka Residen Bahagian Betong nganjung keretas kereja ungkup ngaga Opis Pelilih Mit Maludam ke baru.

Bela datai Menteri Muda Jalai Tebing Pantai, Datuk Julaihi Narawi, Kaban Parlimen Batang Lupar, Datuk Seri Rohani Abdul Karim, Adun Lingga Simoi Peri, Adun Beting Maro Razali Gapor enggau Adun Saribas, Mohammad Razi Sitam.

PELIN PROJEK…Kepala Menteri Datuk Patinggi Abang Johari Tun Openg benung beratika pelin Projek Rayat Skim Nangkir Kampung Maludam Fasa I kemari.