Inisiatif Rumah Panjai Iru Sarawak Energy

KUCHING: Sarawak Energy bejalaika program rumah panjai iru di sitak Pengentap Baru Genturung Pendiau Bakun, Belaga berengkah taun tu.

Nitih ku penerang berita sida, program lima taun nya deka mungkur 15 buah rumah panjai skim pengentap baru genturung pendiau ti ngaul urung 15,600 peranak enggau rumah panjai deka diiru chara begintir dikena nyemelaka saup pemansang genap rumah panjai.

Tiga buah rumah panjai keterubah datai ari 1,700 peranak ti dipilih ungkup taun 2019 iya nya Uma Ukit (650 iku, 79 isi bilik), Uma Lahanan (800 iku, 101 isi bilik) enggau Uma Penan Talun (300 iku, 94 isi bilik).

Berebak enggau nya Sarawak Energy deka ngaul kerejasama genap Komiti Pemansang enggau Pengelikun Genturung Pendiau (JKKK) rumah panjai ba pengawa mutarka bemacham penanggul ditapi pengudah genturung pendiau nya ditumbuh.

NGAUL KEREJASAMA… Peng Maren Uma enggau JKKK ari 15 rumah panjai di Skim Pengentap Baru Sungai Asap begambar ungkup kenang begulai enggau Kennedy Chukpai Ugon enggau Jiwari Abdullah sereta Pemancha Tony Kulleh di Belaga, kemari.

Projek tu deka nyelinting pengawa ngemanahka rampa kelingi rumah panjai nengah pengawa beripai enggau nambahka perengka guna pemun enggau infrastruktur, nyaup peranak dia ba aktiviti main asal dikena ngintu pesaka sereta program pemansang komuniti enggau aktiviti dagang.

Tu nyadi siti ari inisiatif dipejurai enggau dipesetuju ba dua program randau enggau kaul pengawa ti kediri di Bintulu apin lama ke udah, Serakup Orang Asal Tasik Balui (BLNA) ungkup komuniti ulu Bakun HEP enggau Komiti Gawaka Belaga (BAC) ungkup komuniti di sitak ili.

Randau keterubah enggau BLNA, Peng Maren Uma (Serakup Tuai Rumah Panjai) enggau JKKK ari 15 buah rumah panjai di Skim Pengentap Baru Pendiau Sungai Asap ke alai program nya digulu Adun Murum Kennedy Chukpai Ugon enggau Pemancha Tony Kulleh.

Lalu randau kedua enggau BAC udah digulu 14 kaban komiti diketuai Temenggong Ajang Sirek begulai enggau Sekretari Politik Kepala Menteri Beatrice Kedoh Tajang seraya Sarawak Energy diarika Menijar Besai CSR enggau Pengawa Meruan Jiwari Abdullah sereta Menijar Stesyen HEP Bakun Johnny Wong.

Seriris enggau nya ku Jiwari, randau udah meri penerang ngagai kededua piak pasal baka ni ngaul Sarawak Energy ulih ngelangkar jalai ke mua ari sukut pengawa beranakka puku rama.

“Nyadi raban korporat ti menggi tanggungpengawa rama, kami bisi pangku pengawa patut dipejalai lalu deka seruran ngaul diri enggau komuniti beserimbai pendiau ngambi ulih meretika peminta sida lalu baka ni kami ulih nempa pengawa bekunsi ti mujur enggau meri pemaik,” ku iya nerang.

Nya alai ku iya, Sarawak Energy keran nampung kaul kerejasama enggau bala ketuai raban bansa Orang Ulu enggau piak bisi pemerat ba Skim Pengentap Baru Pendiau Bakun di Belaga ngemayuhka pemaik inisiatif beranakka puku rama ungkup peranak dia.

ANGKUN… Kennedy Chukpai Ugon