KUCHING: Program Ngemanah Rumah Rayat Seranta Sarawak (PPRMS) di baruh Projek Mit Pemansang Menua Pesisir (MRP) Perintah Nengeri Sarawak deka mantu ngemanah rumah pesaka penerima bantu di Satok ditu.

Bantu sepenyampau RM15,000 ngagai genap rumah penerima bantu dikena nukar ramu rumah baka atap, dinding, agu enggau dek.

Penerima bantu PPRMS ari Kampung No.3 Satok, Dayang Selbiah Awg Sejili, ngarapka bantu nya ulih ngeneguhka agi rumah pesaka ti udah manggai 100 taun.

“Taja atap tuduh, dek retai sereta tiang repuk, tang ditu aja endur kami menyanak ngenduh.

“Terima kasih ngagai Perintah Nengeri Sarawak enggau GPS udah meri bantu ngambika rumah pesaka ditinggalka apai ku tu agi ulih endur diau,” ku iya.

Peranak Kampung Kudei Baru Iban, Micheal Tugat Dagang 50, berasai lantang lebuh rumah iya ke udah manggai 40 taun ampit nerima bantu nya.

“Hope Place Society Kuching bisi datai nganjung pemakai kitu, dua tauka tiga bulan sekali sereta meri bantu mata duit penyampau RM250,” ku iya nambah.

Micheal diatu mati tubuh sepiak pengudah bebadi, ngandalka rumah iya ti nadai disambung bekal ai enggau karan deka diseleti nengah bantu diberi nya.

Siku agi penerima bantu ari Kampung No.3 Satok Abdul Rahman madah, iya ngarap kereja ulih dirumban laban bini iya diatu sakit kenyau ari bulan Januari, ngambika ulih belelak ba rumah baru ila.

“Aku semina minta bantu nukar atap aja tang nadai nyangka dibantu nyeleti bilik enggau agu ti nyauka runtuh,” ku iya.

Nangkan nya, Rosnah Johan mega ampit nerima bantu madah rumah pesaka entua lelaki iya nganti deka runtuh ditabanka kabut laban ramu rumah udah repuk amat.

Sida mega betimbunka ai maya hari ujan sereta mindah ngagai endur ti likun agi maya ai pasang raya laban ai sungai tama ke rumah.

REPUK… Entara rumah deka diseleti nengah PPRMS.

 

PATUT DISELETI… Rosnah nunjukka atap rumah ti deka diseleti rambau atur pejalai ngabas taba PPRMS di sitak Satok.

 

MINTA KASIH… Michael ari Kampung Kudei Baru (Iban), nunjukka perabus rumah ti tuduh ngagai raban ti ngatur pejalai ngabas taba PPRMS sitak Satok.