KUCHING: Sarawak deka terus nyadi palan beranak puku ba menua Malaysia.

Sapit Kepala Menteri ti mega Menteri Pemansang Mengeri Enggau Pengeraja Asal Kedua sereta Menteri Industri enggau Pemansang Pengawa Dagang, Datuk Amar Awang Tengah Ali Hasan madah Sarawak ba penuduk ketiga pemadu atas ba pengawa beranak puku dalam Malaysia ba timpuh lima taun ke udah.

“Sarawak ngelaluka bala pemeranak puku ari menua Malaysia enggau menua luar ngambika sama melabur ngena teknologi moden sereta mantu dalam ngemansangka ekonomi global.

“Ari kerejasama beranak pukul tu ulih nambahka tikas orang gawa ti landik nengah pengawa betukar teknologi, mantu industri bekait enggau pengawa dagang komuniti sereta ngelakuka teknologi ti tegap enggau engkeman ke guna rampa menua,” ku iya.

Awang Tengah madah munyi nya rambau pengawa Economic Workshop and Policy Briefing on Cooperation between China and Sarawak enggau rambai jaku ‘Consultation, Contribution, Shared Benefits and Win-Win’ ba sebuah hotel tebilang ba ditu, kemari.

Datuk Amar Awang Tengah Ali Hasan

Nangkanka nya, Awang Tengah madah Sarawak menua ti tegap ari sukut pengawa dagang lalu bala pemeranak puku anang nangi beranakka puku ba menua tu.

“Ba pegai Kepala Menteri Sarawak diatu, menua tu ngaga siti chara beranak puku dalam pengawa dagang ti kondusif lalu nyamin pemansang pengawa dagang.

“Sarawak sebuah menua ba Malaysia ti ngembuan kerangka kereja undang-undang ti tegap lalu ulih nyamin pemeranak puku digaga bala pelabur endang dijaga enggau manah,” ku iya madah.

Kelimpah ari nya, Awang Tengah madah China siti ari bakih dagang besai Sarawak lalu ba taun 2018, dagang Sarawak enggau China niki 16.8 peratus ngagai RM 18.91 billion.

“Tu nyengkaum RM 12.07 billion asil ekport ngagai China ari ai gis tulen (LNG), minyak sayur (CPO), mesin elekterik enggau ke bukai lalu RM6.8 bilion asil imports ari China nyengkaum produk kimia coke, karbon, aluminium enggau ke bukai.

“Ari asil tu tadi nyadika 13.1 peratus semua asil dagang ba menua Sarawak,” ku iya nambah.

Seraya, pengawa dagang entara Republik Rayat China enggau Sarawak udah lama bepun lalu kedua bengkah menua tu terus ngaga kaul nengah ekonomi rama ti dipunka Menteri Besai dulun suba, Tun Abdul Razak ngagai China lebuh Mei 1974.