KAPIT: Sekula Primari (SK) Nanga Pelagus ditu napi pemerinsa nadai bekal kuasa karan.

Nitih ku penerang, penanggul tu mega nekul kesemua pengawa di sekula nya nyengkaum pengawa ngajar enggau belajar enggau pejalai sistem sekula bemalam mega ditekul.

Tu ngujungka pengelantang bala nembiak, pengajar enggau staf sekula bukai enda diintu meruan.

Penanggul tu nyadi pengudah sebuah ari injin api di sekula nya rusak laban semina sebuah aja ulih idup kenyau ari bulan Mac tu tadi seraya bekal kuasa karan mega ditatak ngagai 18 jam aja sehari.

Tau disempama baka udah aruk dipukung enggau alung, udah labuh ditinggang lesung pengudah injin api kedua mega rusak kena 18 April tu tadi lalu nadai atur pengawa serikat ti menggi tanggungpengawa mutarka penanggul tu nyentuk sehari tu.

Penanggul baka tu balat ngenusah sekula di kandang menua ulu laban semua pengawa ngajar enggau belajar sereta pekara bukai mega bepanggai ba bekal kuasa ari injin api tu.

SK Nanga Pelagus tu entara 369 buah sekula di Sarawak ti nadai disambung bekal kuasa karan ti meruan tang semina bepanggai ba injin api aja.

Naka diatu 45 iku nembiak, 15 iku pengajar enggau tujuh iku staf bukai diau dalam petang maya malam hari sereta napi pemar bejalaika pengawa maya siang hari.

Dikearap penanggul tu jampat teputar sereta ulih ngemai pengelantang ngagai semua kitai lalu bala nembiak ulih belajar baka selama.

RUSAK… Kededua injin api sekula bela rusak.

 

NADAI KARAN… Sekula napi penanggul tejanggal kuasa karan.

 

BERASAI PUANG… Rampa sekula SK Nanga Pelagus.