KUCHING: Penemuai Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah enggau bini iya Raja Permaisuri Agong Tunku Azizah Aminah Maimunah Iskandariah ke Sarawak kena 25 enggau 26 April tu nerima timbal manah ari mensia mayuh.

Yang di-Pertuan Agong pagila deka bejalai meda utai ti dijual nyengkaum perengka pengelandik jari enggau pengawa mandang chara ngaga kek lapis Sarawak sebedau ngelawa tebing sungai Sarawak.

Norlela Othman, 20 taun, siku pedagang nyual ai manis enggau pemakai madah, beserimbai enggau penatai Yang di-Pertuan Agong, iya deka meri awak ngagai raban pengatur mandangka asil pengelandik jari sida.

“Nyangka aku deka ngetu bedaja tumu ari jam selama laban meri awak ngagai raban pengatur ngaduka pengawa sida,” ku iya lebuh dirandau Suara Sarawak pagi tadi.

Nitih ku Shajahan Haji Sayed Ahmad, 59 taun ti ngempu kedai lumur 27, udah bedagang macham bansa kain lebih 50 taun dia, sida endang udah nyikap diri nganti penatai pemesai menua nya.

Norlela Othman

“Tu penemuai keterubah seduai melaki bini kitu, tu peluang betemu enggau pemesai menua enti sema bisi ngabas kami kitu, aku endang chukup lantang ati.

“Bala pekereja mega gagit sereta kiruh nyendiaka diri ngelalu penatai seduai lagi. Bisi bala pekereja besapuka uras, napis kain, ngitang tambai sereta mandangka chura enggau bansa bungai kain ti narit ati,” ku iya.

Chairmain Serakup Pedagang India Street, bempu kedai lumur 90, Dato Wee Hong Seng madahka diri temegah ati nganti penatai Yang di-Pertuan Agong laban tu penemuai keterubah ngagai palan sida bedagang.

“Kandang tiga hari ke udah kami kiruh meresi kedai sekalika di dalam enggau di luar mega. Penatai seduai sekali tu nyerumba hari besai Gawai Dayak enggau Hari Raya ti deka datai.

“Tu mega ngemai reti chukup besai ngagai kami ti udah lama bedagang ditu, kenyau ari taun 1932.

Shajahan Haji Sayed Ahmad

“Enti sema iya bisi ngelawa kedai aku, aku deka nunjuk kain asal ari Sarawak tu empu baka batik Sarawak enggau Pua Kumbu,” ku iya.

Nangkan nya, Rosli Bin Hidin, 69 taun, madahka diri gagit ninga rita penemuai Yang di-Pertuan Agong kitu.

“Gagit amat asai lebuh ninga rita Yang di-Pertuan Agong kitu laban tu keterubah iya nemuai. Kereja ngupas sungai benung chakah dipejalai diatu baka muai uras ti tepekul nebing sungai,” ku iya.

Pia mega Musa Bin Dahlan, 47 taun, gawa kediri madah juluk ati deka ngemai Yang di-Pertuan Agong numpang bot iya.

“Lemai pagila kami enda nyendiaka servis bot tambang laban meri basa ngagai penemuai pemesai menua tu. Aku andal amat seduai melaki bini numpang bot aku,” ku iya nandu.

Dato Wee Hong Seng

 

Rosli Bin Hidin

 

Musa Bin Dahlan