KUCHING: Bala nembiak patut ngerebut peluang ngulu kus betanam dikena belajar enggau ngiri penemu baru.

Pengelicha Universiti Teknologi MARA (UiTM) Kampus Samarahan Profesor Madya Dr. Abdul Rahman Saili madah, betanam ngembuan peluang chukup besai belalauka makit ke bisi diatu.

“Ba Malaysia, kitai semina mansutka berau 53 peratus aja seraya 47 peratus import berau ari menua luar.

“Beratika pekara tu, raban nembiak ditu patut ngerebut peluang ngaul diri ba pengawa betanam nentuka menua badu agi meli berau ari menua luar laban bisi pemansut kediri empu,” ku iya.

Iya mansutka jaku tu lebuh mantaika keretas jurai ba Komiti Perunding Nembiak Nasional (MPNB) Renggat Sarawak 2019-2020 ba Sri Rampai Banquet Hall ditu tadi.

TIMBAL PENEMU… Abdul Rahman Saili mantaika keretas jurai rambau MPNB Renggat Sarawak 2019-2020.

Ku Abdul Rahman, nembiak rebak baru diatu ngembuan runding betanam nya pengawa ti kasar, tusah enggau kamah.

“Runding baka tu patut dibuai laban pengawa betanam betupi diatu jauh bida ari suba laban bekenaka mayuh pemansang teknologi.

“Ambika chunto, pengawa betanam chara pintar, ngaul mayuh teknologi ba pengawa betanam betupi kelebih agi maya ngesum, manchit tauka fertigasyen,” ku iya.

Pia mega ku, Abdul Rahman, runding bala nembiak ti ngumbai pengawa betanam tu mayuh kelikuh sereta kiruh patut diubah laban kitai diatu bisi sukung ari pemansang teknologi.

Nya alai perintah tauka raban bekaul patut mandangka pengelebih pengawa betanam tu ngagai raban nembiak ngambika sida nemu pengawa tu ukai semina betanam di tanah aja tang mungkur semua pengawa.

“Bala nembiak belajarka pengawa betanam ulih ngereja nyadi batang pengawa sida sereta mansutka belanja ngagai isi bilik.

“Apai indai enda patut nagang anak sida ti angkunka pengawa betanam laban pemujur bala nembiak diatu bepanggai ba pengeran enggau pengepuh sida gawa lalu ulih maju ba pengawa sida,” ku Abdul Rahman.

Komiti MPBN sebagi ari komiti ti nyadi kaban mantu bala nembiak ba menua tu ba pengawa bekaul sereta nentuka pemansang raban nembiak seruran ditampung.

Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah udah dipebasa bejadika MPBN di Sri Rampai Banquet Hall tadi.