Madu kelulut Kinyau

Puh nanam pun bungai sereta enda nunu babas sengapa nyadi sebagi ari pengawa ti patut dikemeran dikena ngintu kelulut nentuka madu iya seruran bisi kualiti enggau tan lama.

Tang sida ti nupi kelulut di Bukit Kinyau chukup benasit laban menua nya dikelingi kampung asal sereta mayuh kayu Akasia, Gelam enggau Gerunggang ti suah ditapatka indu kelulut.

Endur ti lantang enggau kesuh angin chiru di menua urung 7 km penyauh ari Sarikei mega nyadi pematak indu kelulut besarang.

Mohd Jamaluddin Man ti nupi kelulut madah, sebagi ari madu kelulut dipansut di Bukit Kinyau ungkup guna diri empu, semina dijual enti bisi peminta.

CHULIN… Jamaluddin nunjukka madu kelulut diambi terus ari sarah.

Kenu ku, rampa menua asal ke bisi dia baka pemeri petara pemadu berega laban sida enda ibuh kiruh nanam mayuh pun bungai.

“Kami ngaga sarah kelulut besemak rumah di tisi kampung. Pengawa tu mega enda begunaka ungkus tinggi, nyamai dijaga enggau kelulut mega mansutka madu ti mayuh.

“Ba aku empu, pengawa nupi kelulut tu baka ngelantangka runding diri. Enti bisi awak lepa sekalika pagi tauka lemai, aku deka ngelawa ujung bilik meda sarah kelulut tu,” ku iya lebuh dirandau Suara Sarawak.

Ku Jamaluddin ti mega Ketuai Ranting Parti Pesaka Bumiputera Bersatu (PBB) Bukit Kinyau, inisiatif sida nyendiaka pemansut pemakai ti manahka pengerai kelimpah mantu nempa endur diau ti beresi sereta bepengerai.

Pia mega ku iya, tu mega nyadi pemansut belanja tambah ngagai peranak Kinyau ti tebal agi sida tu bumai enggau berikan di sungai.

PUH… Jamaluddin puh ngintu kelulut lebuh lepa pengawa.

Naka diatu ku iya semina empat isi bilik udah ngaul diri nupi kelulut.

“Sarah kelulut ti digaga ari lumpung kayu baka Nyireh ditebang kami empu laban bansa kayu tu mayuh tumbuh ditu.

“Genap sarah enti dijaga enggau meruan ulih mansutka madu kelulut enggau jelan penatai pemisi RM100 sekilo,” ku iya.

Ngelansa pasal pemanah madu kelulut ti ngundan mayuh pengelebih nyengkaum ulih nyadi ‘sakang’ nyumanka bemacham bansa penyakit.

“Tu nyengkaum nyumanka penyakit kulit, mati tubuh sepiak, kemi manis, riman, semua, ngeringka tulang, ampuh, beging, nagang batu karang, ngurangka kolestrol enggau ke bukai.

“Berebak enggau nya, kami agi begunaka embing ejensi bekaul nyaup nambahka asil madu kelimpah makit ungkup kelulut Kinyau,” ku iya nambah.

MERUAN… Rampa ngelingi ti beresi sereta kesuh angin chiru pematak kelulut besarang di Bukit Kinyau.

 

MAYUH PENGELEBIH… Kelulut ngiga makai maya hari angat.

 

BISI PEMINTA… Madu kelulut diatu majak nerima peminta.

 

MERUAN… Rampa ngelingi ti beresi sereta kesuh angin chiru pematak kelulut besarang di Bukit Kinyau.