Projek Rayat Tinjar Renggat Kedua

KUCHING: Opis Menteri Utiliti Sarawak begulai enggau Opis Bekal Ai Menua Pesisir (JBALB) Sarawak ngeluarka timbale penerang baka ti dikeluar ba surat berita Jaku English menua tu ti nyebut ‘Authorities asked ti install water taps at Tinjar Treatment Plant for villagers’ kena 19 April 2019.

Nitih ku penerang Opis Menteri Utiliti enggau JBALB Sarawak, ejensi sida nemu enggau sedarka isu genturung pendiau ti nadai disambung bekal ai nya.

Nya kebuah Projek Rayat Tinjar Renggat Kedua udah dilanggur dalam Atur Pemansang Malaysia Lumpar Ke-11 (RMK-11) di baruh Opis Menteri Pemansang Menua Pesisir (KPLB) Malaysia dikena mutarka penanggul suntuk bekal ai di sitak Tinjar nyengkaum kandang menua nya.

Kepala Menteri Sarawak Datuk Patinggi Abang Johari Tun Openg mega udah ngemendarka agih belanja penyampau RM70 juta di baruh projek tu rambau pejalai gawa ngelawa menua Tinjar dalam bulan Mac tu tadi.

Tuju belanja tu dikena ngerumban projek sereta nentuka penanggul ditapi rayat di jampat teputar.

Projek tu mega deka ngaga sambung paip ngagai Kampung Bukit Limau, Long Tuyut enggau Menok.

Ku penerang nya, projek tu dipelaba berengkah digaga dalam bulan Jun 2019. Pengudah tembu ila, peranak dia deka nerima pemaik ari bekal ai beresai ti disambung.

Berindik ari nya, Perintah Sarawak nengah JBALB benung chakah bejalaika Projek Rayat Pakej Wilayah Utara 2 (NR2) ti ditukar ngena batang paip baru di kandang menua Lapok enggau Tinjar.

Projek tu udah berengkah dipejalai dalam bulan Mac tu tadi sereta disadang tembu dalam pun taun 2020.

Seraya inisiatif tekala nya dipejalai JBALB Bagi Menua Miri deka nganjung bekal ai beresi ngena lori tangki ngagai peranak di genturung pendiau nya.

Bala penguna dia mega tau minta penerang enggau bantu ai irup ari Opis Pengintu Pengelantang Pendiau Mensia Mayuh (JKM).

Berindik ari nya, Opis Menteri Utiliti Sarawak enggau JBALB Sarawak endang keran nentuka semua isu enggau penanggul bekal ai teputar jampat ngambika rayat ulih ngereja pengawa sida baka selama.

Enti sema bisi penanggul suntuk bekal ai tauka minta ai dianjung terus ngagai genturung pendiau sida ulih telefon nuju JBALB Miri ba lumur 085-442204.