SARATOK: Tanggungpengawa besai dilempaika Perintah Besai nengah Opis Menteri Pelajar ngagai Nengeri Sarawak ngepunka subjek Sains enggau Matematik diajar ngena Jaku English di sekula primari.

Ku MP Saratok Ali Biju, tu nyata ngayanka pengandal tinggi sida ke penau menua kitai ngemujurka polisi pelajar lalu tu berita ke chukup manah ngagai kitai ditu.

“Kitai bela nemu pemesai guna Jaku English kelebih agi napi pemansang teknologi kemaya hari nyengkaum Revolusyen Industri 4.0 ti begunaka penemu enggau pengelandik tinggi.

“Puji Tuhan laban Perintah Besai enggau Perintah Nengeri udah setujuka langgur penemu ngajar Sains enggau Matematik ngena Jaku English dipun di Sarawak lalu tu ngemai mayuh pemaik ngagai kitai ditu,” ku Ali.

Iya mansutka jaku tu lebuh bejadika Pengawa Nasih Tanah Projek Tanggungepengawa Rama Korporat (CSR) SK Engkabang di Saratok ngarika Menteri Kereja Raya Baru Bian ti enda ulih limpang ketegal beserak enggau pengawa bukai, sehari tu.

NGEPUN PENGAWA… Ali bejadika pengawa nasih tanah taba begunan sekula baru deka didiri di SK Engkabang.

Ku iya, projek SCR tu datai ari pengawa manah Jalai Besai Pan Borneo Sarawak ngaul kerejasama entara serikat korporat enggau Opis Menteri Pelajar Malaysia (KPM).

Kitai nerima manah penerang dipansutka Opis Menteri Pelajar ensanus ti madahka agih belanja RM1 bilion baka ti udah disemaya Perintah Besai dalam bulan Februari taun tu tadi deka dikeamat enda lama agi dikena nyeleti sekula repuk di Sarawak, ku iya nerang.

“Agih belanja tu nyampau amat, enti dikena manah nyangka 80 peratus sekula repuk di menua tu ulih diseleti kitai.

“Kitai deka bekerejasama enggau semua piak ti bisi pengeran gawa besaup ngemansang enggau nyendiaka penyikap perengka guna meruan kelebih agi sekula di menua pesisir,” ku iya madah nyemetak.

Ali mega ngena awak nya meri tabi puji ngagai serikat korporat ti udah bejalaika projek CSR sida mantu sekula di menua pesisir ngangkatka tikas pemanah perengka guna di sekula nya.

“Pengawa baka tu patut ditunda serikat korporat bukai sereta meransang mayuh agi sida datai ke mua nangkup peminta perintah ngerumban pemansang di menua pesisir,” tandu iya.

GAGIT… Bala nembiak enggau sida ke bukai ngambat penatai Ali ba jalai penama endur ngatur pengawa.