Inisiatif ngajar subjek Sains enggau Matematik ngena Jaku English

BETONG: Perintah Sarawak ngagihka belanja besai bejalaika bemacham inisiatif nyengkaum nyendia pengawa ti bepenau ngajar subjek Sains enggau Matematik ngena Jaku English.

Chairman Biro Pelajar Serakup Raban Islam Saribas (Perwaris) Dr Abang Ismail Abang Julhi madahka pengawa tu endang patut disukung.

Ku iya Perwaris nyukung tegut pengawa ti dipejalaika perintah tu.

“Nitihka pematut subjek Sains enggau Matematik diajar ngena Jaku English patut ditampung ari suba.

Abang Ismail Abang Julhi

“Kebuah pia laban perintah udah ngeluarka belanja besai nyikap bala pengajar, perengka guna sereta ngatur bengkel enggau kus dikena ngenegapka sida ti dilempai tanggungpengawa ngajar subjek nya.

“Nya kebuah kami endang nyukut juluk Perintah Sarawak ti bejalaika inisiatif ngepunka baru pengawa tu,” ku iya madah nyemetak lebuh dirandau Suara Sarawak, tadi.

Nangkan nya ku iya, pengawa tu patut dipun ari sekula primari lalu ditampung ngagai sekula sekondari nentuka iya ngasi ngagai bala nembiak.

Hari Tiga tu tadi, Menteri Pelajar Dr. Maszlee Malik madahka Sarawak deka nyadi nengeri keterubah bejalaika pengawa ngajar Sains enggau Matematik ngena Jaku English baka dijuluk Menteri Besai Tun Dr. Mahathir Mohamad.

Dr. Maszlee mansutka jaku tu lebuh nemuai meri basa ngagai Kepala Menteri Datuk Patinggi Abang Johari Tun Openg.

Kenu ku Menteri Pelajar, Sains enggau Pansik Teknologi Dato’ Sri Michael Manyin, Sarawak udah berengkah matih 400 iku pengajar nengah beberapa kus ari kerejasama sekeda palan pelajar tinggi dikena nyendiaka pengajar ti ngajar bala pengajar nya.