KUCHING: Sapit Kepala Menteri Datuk Amar Awang Tengah Ali Hasan nagit RM6.5 ngagai RM7 juta penyampau asil diulih ari utai dijual maya Ekspo SME enggau Kayu Ramu Sarawak 2019 deka diatur berengkah ari 27 nyentuk 30 Jun di Palan Konvensyen Borneo Kuching (BCCK) ditu.

Iya ke mega Menteri Pemansang Mengeri Enggau Pengeraja Asal Kedua enggau Menteri Industri enggau Pemansang Pengawa Dagang madah, sida ngadang nerima penatai bala pengusung lebih ari ekspo sebedau tu.

“Ekspo tu mega ngadang nerima lebih ari 15,000 iku pengusung datai ngerichahka atur ekspo pengelama empat hari berunggu tu.

“Berambaika leka jaku ‘Ngena Pemaik Teknologi Digital dalam Ngubah Industri Kayu enggau SME’, aku narapka ekspo tu mujur baka dijapai 2017 laban kitai nagit penyereta ari menua tu enggau entarabansa.

“Nengah ekspo tu, Gempung Pemansang Industri Kayu Ramu Sarawak (STIDC) enggau Opis Menteri Industri enggau Pemansang Pengawa Dagang Sarawak andal ulih matak penatai pengusung sekalika ari menua tu empu tauka menua luar meli produk kayu Sarawak,” ku iya.

NERANG… Awang Tengah disempulang Datuk Haji Narhoden Majais (kiba) rambau aum pengarang berita Ekspo SME enggau Kayu Ramu Sarawak 2019 di Kuching kemari.

Ku iya, maya ekspo tu ila bisi dua bansa produk deka dipandang ti dikumbai Balai Buluh enggau Rumah Akasia.

“Rumah Akasia tu asil kerejasama enggau Samling Housing Product Sdn Bhd ti mandangka pemesai guna Kayu Akasia.

“Nengah kerejasama entara STIDC enggau Samling Housing Sdn Bhd tu Sarawak dikearap ulih mansutka produk Kayu Akasia bisi kualiti rembus ngagai makit dunya,” ku iya rambau aum pengarang berita ditu kemari.

Balai Buluh mega deka mandangka asil produk digaga ari buluh.

“Buluh diatu nyadi sebagi ari pemansut asil beguna amat laban ulih buluh tumbuh galak nitihka gaya hari di menua kitai sereta pun buluh jampat tumbuh enggau rumpas diintu.

“Produk ti seruran bisi peminta diatu iya nya sepit makai enggau bakul ti rumpas agi dianyam.

“Produk buluh tu mega ulih ngangkatka tikas pemansang kayu berindik ari pansik guna buluh meruan dipejalai palan SME di Sarawak,” ku iya.

Seraya Aum Besai enggau Ekspo Langkar Tengkebang Sarawak 2019 ti keterubah diatur tu nengah kerejasama entara STIDC, Unimas enggau Palan Teknologi Bandung (ITB) sereta disaup Opis Konsul Jeneral Indonesia berengkah ari 27 ngagai 28 Jun berambaika jaku ‘Bai Langkar Tengkebang Ngagai Menua Kitai di BCCK ti mandangka pemesai reti gamal langkar tengkebang ba industri kayu di Sarawak.

Awang Tengah mega nengah aum nya meri tabi puji enggau terima kasih ngagai semua ejensi ti udah kiruh mantu ngatur pengawa ngelakuka ekspo nya.

Sama datai Menteri Muda Pemansang Dagang Mit enggau Jelan Pemesai (SME), Datuk Mohd Narodin Majais disempulang bala pemesai STIDC ke bukai.