KUCHING: Perintah Nengeri nagit 1 juta hektar ungkup pengawa nanam kayu datai ba taun 2025.

Menteri Pemansang Industri enggau Dagang Datuk Amar Awang Tengah Ali Hasan madah, pengawa ngemansangka kayu bansa Akasia sebagi ari pemansut besai industri kayu di Sarawak.

“Akasia bansa kayu ti jampat tumbuh lalu ulih nyadi pemansut ti ulih dikena baru ti diaku nengah setipikit ‘produk gadung’.

“Ari kaul kerejasama pengawa Pemansang enggau Pansik (R&D) bekenaka pemaik Akasia nengah Samling Group, tu deka negapka agi kaul kerejasama STIDC ngelakuka Akasia nyadi kayu alternatif ba industri produk kayu ramu di Sarawak.

“STIDC keran ngetuai pemansang industri kayu ramu nengah Perabot Akasia ungkup makit entarabansa enggau tuju ngangkatka Sarawak nyadi palan produk tu jemah,” ku iya rambau aum pengarang berita Ekspo SME enggau Kayu Ramu Sarawak 2019 Ke-4 enggau Aum Besai sereta Ekspo Langkar Tengkebang Sarawak 2019 kemari.

MALIN… Awang Tengah mega isi bup begulai enggau Penulung Direktor Kastam Sarawak, Bong Sian Tin (empat kanan) seraya dikemata Datuk Haji Narhoden Majais (kiba) enggau Datuk Haji Len Talif Salleh (kanan).

Iya mega beratika pengulih buluh ti ulih ditanam ari pemisi dandang tanah, tanah ti manah enggau gaya hari engkeman di Sarawak.

“Pemisi pemansut buluh di Sarawak diatu bisi pangku pengawa besai kelebih agi dikena ngaga sepit makai enggau bakul.

“Buluh nyadi sebagi ari utai tanam ti jampat tumbuh, semina begunaka tiga ngagai empat taun aja.

“Buluh tu pemansut mata ti ulih dikemaru enggau bepengulih besai ba industri Mit enggau Jelan Pemesai (SME) ke bisi di Sarawak baka kayu batang,” ku iya.

Pia mega ku Tengah, buluh tu tau nyadi rega tambah ngagai komoditi kayu ramu. Buluh mega ulih dikeandal nyaup pemansang palan SME nengah pengawa R&D di Sarawak.