Sains enggau Matematik diajar ngena Jaku English

KUCHING: Sarawak deka nyadi nengeri keterubah mungkal pengawa ngajar subjek Sains enggau Matematik ngena Jaku English ku Menteri Pelajar Dr. Maszlee Malik.

Kenu ku iya, pejalai pengawa tu setipak enggau juluk Menteri Besai Tun Dr. Mahathir Mohamad ngambika subjek Sains enggau Matematik diajar ngena Jaku English.

“Perintah Sarawak mega setujuka langgur penemu ngajar Sains enggau Matematik ngena batang jaku tu.

“Tu mega deka nyaup kitai ari sukut bejalaika pengawa nyengkaum matih bala pengajar,” ku iya.

Iya mansutka jaku nya ngagai pengarang berita pengudah ngatur pejalai nemuai meri basa ngagai Kepala Menteri, Datuk Patinggi Abang Johari Tun Openg di Wisma Bapa Malaysia ditu, kemari.

Ku Maszlee, sida mega bisi diterang ke alai Perintah Sarawak bisi bejalaika bemacham inisiatif begulai enggau Opis Pelajar Nengeri enggau sekeda palan pelajar tinggi menua tu nentuka bala pengajar ulih ngajar ngena Jaku English.

Ngelansa silik pasal pekara nya, Menteri Pelajar, Sains enggau Pansik Teknologi, Datuk Sri Michael Manyin ti bisi nyempulang Maszlee madahka sekeda kus udah dipejalai sebedau tu.

“Kitai udah berengkah matih 400 pengajar sekula primari ti ngajar subjek Sains enggau Matematik ngena Jaku Englisj nengah sekeda kus.

“Kitai mega udah berandau enggau sekeda palan pelajar tinggi di Sarawak nganjung pengajar matih bala pengajar bekaul,” ku iya nerang.

Ku Manyin, pengawa matih bala pengajar tu ukai pengawa ti muntang tang pengawa ti patut dipun enggau dipejalai.

Sama bisi nyempulang penemuai basa nya Ketuai Sekretari Opis Menteri Pelajar Datuk Dr. Mohd Ghazali Abas enggau Direktor Opis Pelajar Malaysia Nengeri Sarawak Dr. Azhar Ahmad.

PEMERETI ATI… Dr. Maszlee (tiga kiba) betabi enggau Abang Johari seraya dikemata bala bukai rambau pejalai nemuai meri basa ngagai Kepala Menteri di