GPS nadai ngemeranka sistem merintah bechiping bansa

“Nadai siti pengarap tauka bansa di Sarawak ngembuan penyampau ke majoriti merintah kediri, nya alai kitai patut bekerejasama ngambika kitai nyadi kering baka ke suah disebut Kepala Menteri, Datuk Patinggi Abang Johari Abang Openg”.

KUCHING: “Gabungan Parti Sarawak (GPS) nadai ngemeranka sistem merintah bechiping bansa” ku Sapit Kepala Menteri, Datuk Amar Awang Tengah Ali Hasan.

“Semua bansa ngembuan peluang sebaka enda kurang enda lebih ari bansa bukai, dalam sebarang aja bidang.

“Nadai siti pengarap tauka bansa di Sarawak ngembuan penyampau ke majoriti merintah kediri, nya alai kitai patut bekerejasama ngambika kitai nyadi kering baka ke suah disebut Kepala Menteri, Datuk Patinggi Abang Johari Abang Openg”.

DATUK AMAR AWANG TENGAH ALI HASAN

Iya madah munyi nya maya Pengerami Nyuaka Insentif Nembiak Nyulut enggau Pemeri Ngagai Masjid sereta Surau Bagi Menua Serian di Balai Raya Ranchan, kemari.

Awang Tengah ke mega Menteri Pemansang Mengeri enggau Pengawa Dagang madah taja pengarap rasmi Perintah Besai iya nya Islam, tang pengarap bukai peneka ngemeranka jalai pengarap sida.

“Ambika banding, di Sarawak kitai bisi Unit ungkup Pengarap Bukai (Unifor) lalu semina nengeri tu aja bisi numbuhka unit tu di Malaysia.

“Juluk enggau nama dikedeka ari penumbuh Unifor iya nya dikena ngetanka jalai pengiduop ti lantang entara pupu bansa enggau komuniti di Sarawak,” ku iya.

Kelimpah nya, iya mega madah, patut iarka penemu ektremis pengarap tauka bansa ngambika pengelantang enggau pengelikun ulih ditan ke pemaik menua enggau bansa.

 

“Nyema sesebengkah menua charut sereta nadai pengelikun, nyadi nya deka ngujungka rayat seranta, nadai pemansang enggau mayuh agi ke bukai.

“Kitai beambika chunto baka ba menua-menua Timur Tengah, taja kaya enggau asil minyak tang tetap nadai pemansang laban nadai sepenemu enggau pangan diri nyentuk nyadi perang,”

Ba pengerami ke diatur Kaunsil Dikearap Ngintu Pengelantang Islam Serian (Lakis) nya, bisi 33 iku nembiak nyulut ba peresa UPSR, SPM enggau STPM.

Kelimpah nya, urung 25 buah masjid enggau 21 buah surau ba bagi menua Serian bela nerima pemeri RM1,000.

ENDA BECHIPING…Awang Tengah (bediri, tengah) begulai enggau bala bukai pengudah nyuaka Insentif Nembiak Nyulut enggau Pemeri Ngagai Masjid sereta Surau Bagi Menua Serian di Balai Raya Ranchan, kemari.