Baya baruh rumah, bilik dipasuk ular

KUCHING: Beduduk ari penanggul rumah ti enda likun alai diau sereta pemerinsa ngidupka diri ngasuh indai ngagai tiga anak minta bantu ari Hope Place Kuching.

Nitihka penerang ari Hope Place Kuching, Siti Nor Fauziana, 34 taun enggau tiga iku anak sereta laki iya diau ba Kampung Semariang Baru jauh ari jalai alun lalu ngelayang nengah jematan ti nyau deka runtuh.

Ku laki Fauziana, Mohamad Hanifi Sim Abdullah, 48 taun ba baruh rumah alai sida diau diatu suah dipeda bisi baya.

“Baya ulih dipeda ba baruh rumah kami tu.

BARANG PEMAKAI… Pemungkal Hope Place Kuching, Kevin Wan meri pemakai ngagai sida Fauziana sebilik.

“Lebih agi lebuh ai pasang besai, baya endang dipeda ari rumah tu,” ku iya.

Kelimpah ari nya, Faizura madah anak iya ke lumbur dua (diatu berumur 12 taun) kala labuh ari papan kayu lalu telih ba pala.

“Ukai semina nya, mayau ke ditupi aku mega kala labuh ngagai ai ba baruh rumah lalu ditagup baya.

“Pemar ke bukai, bilik mandi suah dipasuk ular, lalu kami kala meda baya pemanjai tujuh kaki nyemerai ba baruh bilik mandi kami dia,” ku iya.

Nangkanka nya, bala anak seduai ngena jalai ti petang, niti andau ti enda tegap sereta enda likun ditengah.

BAYA BARUH TU… Fauziana nunjukka palan sida suah meda baya nyemerai ba baruh rumah.

Kelimpah ari nya, Hanifi ti gawa kontrak enda ulih ngereja pengawa berat pengudah iya bisi penanggul ba pengerai lalu diatu iya semina ulih ngereja pengawa plaster aja.

Tang semua belanja ti diulih ari nya semina chukup dikena nampung belanja berubat iya aja, ku Fauziana.

Penusah bukai diasaika sida tu penanggul ba ai, kekadang ai kamah tauka terus nadai ai.

Nya alai, sida ari Hope Place Kuching mantu sida ari sukut pemakai, sereta sida chukup gaga nerima bantu nya.

Barang sapa ka meri bantu ngagai sida Fauziana tau nanya enggau silik ngagai piak Hope Place Kuching ba lumbur telefon 082-505 987.

PEMAR… Entara pemar ti diasai sida Hope Place Kuching lebuh nganjung bantu pemakai.