KUCHING: Program Anjung Singgah YKN ti dipejalaika Gerempung Pengintu Pengelantang Harapan Kuching (Place of Hope) udah mantu siku indai tunggal ti ngembuan tiga iku anak beumur dua, tiga enggau tujuh taun kena ke 23 April tu tadi.

Nitihku penerang, Kaban Hope Place Ediawati iya nya pengereja pengawa ba Anjung Singgah nya, Noraida Binti Abdul Gani diau ba Anjung Singgah tu kenyau Januari 2019 lalu iya udah bulih pengawa nyadi Rela ti dibayar RM5 sejam berapa ari udah lalu.

“Nya alai gerempung tu nulung iya nyendia ke diri deka pindah ari Anjung Singgah sebedau iya nerima gaji bulan keterubah.

“Noraidai dibai ngagai Anjung Singgah nengah bantu Hope Place Kuching lalu iya diberi bantu baka beras, minyak, garam, gula, milo, roti, mee, tepung tusu, tilam enggau panggal.

“Lalu bantu tu disua orang ti keterubah numbuh ke gerempung tu iya nya Kelvin Wan ba mua aku empu,” ku iya.

Diatu gerempung tu udah mantu lebih 190 ruang bilik ti beguna ke tulung. Lalu mensia mayuh ti deka nyua pemeri mata duit ulih meri nengah akaun Maybank, Hope Place Kuching ba lumur 5112-8900-1160.

Nyema bisi mensia mayuh deka ngiga penerang ke silik pasal Hope Place Kuching, tau betelefon nuju lumur 082-505 987 berengkah 8.30 pagi nyentukka 5.30 lemai, Hari Satu ngagai Hari Lima. Lalu 8.45 pagi ngagai 12.00 tengah hari kena Hari Enam.

PENYIRU HOPE PLACE…Noraida (dua kiba) nerima barang bantu ari ari Pemungkal Hope Place Kuching Kelvin Wan.