KUCHING: Siku bini orang ti nadai gawa alah tipu nengah ‘Macau Scam’ ngujungka iya rugi RM15,000.

Ketuai Opis Pansik Penyalah Komersil Sarawak, Superintenden Mustafa Kamal Ghani Abdullah madah, pekara tu diripotka nyadi ensana.

Kenu ku iya, bepelasarka ripot diterima polis, dia indu ke beumur 41 taun nya madah diri bisi nerima kangau telefon ari siku lelaki Melayu kena 23 April tu tadi lalu madah iya bisi utang GST penyampau RM50,000 sereta bisi ngereja pengawa ngaga duit palsu penyampau RM150,000 nengah akaun indu nya.

“Penerang nya dikematka indu tu lalu iya dipinta berandau enggau siku agi pemesai kastam ti ngambi penerang ari iya.

Nerang silik, Kamal madah, saspek minta indu nya nepu duit ngagai akaun ke udah diberi dikena mutarka kes nya dikena meresa duit nya iya dipadah deka diberi duit nya baru dalam timpuh 2 jam.

Ku iya, indu nya tusah ati lalu udah ulih ditipu nepu duit penyampau RM15,000 ngagai akaun ke diberi saspek.

“Iya nemu diri kena tipu pengudah nganti dua jam lalu berati duit nya nadai diberi baru baka ke udah disemaya saspek.

“Kes nya dipansik nitihka Seksyen 420 Kanun Keseksaan ketegal nipu,” ku iya.

Berindik ari nya, dia iya ngelalau mensia mayuh patut bejimat lalu anang alah kelikuh nyema bisi nerima kangau telefon ari orang ke enda dikelala tauka nyaru diri ari opis tauka ejensi perintah.

“Ejensi perintah sigi enda minta orang nepu duit ngagai sebarang akaun,” ku iya.

Supt Mustafa Kamal Ghani