KUCHING: Raban Bumiputera patut landik ngemansangka diri nyema deka sama maju enggau bansa bukai, ku Kepala Menteri Datuk Patinggi Abang Johari Tun Openg.

“Bumiputra enda ulih semina ngarapka perintah meri projek dagang laban perintah udah mantu dalam mayuh bengkah penyenang infrastuktur baka jalai alun, elektrik enggau ai beresi.

“Kitai mega patut mereti ke pengawa ngena tanah sereta pengelandik ti betul awak ulih meri empas ti manah ngagai ekonomi menua,” ku iya rambau bejadika aum ninting taun Komiti Dayak Komersial enggau Industri (DCCI) ditu, kemari.

Kelimpah nya, Abang Johari madahka raban Bumiputra mega patut chakah bekerejasama enggau perintah meri fokus ngagai menua pesisir dalam ngemansangka dagang.

“Diatu perintah bisi belanja ti ulih dikena mantu kita Bumiputera sebaka enggau bansa bukai, tang enti kita empu enda ngemansang kediri dulu baka ni kita ulih ngambi peluang maju kelebih agi sida di menua pesisir.

“Peluang ti diberi perintah nadai bechiping ungkup rayat menua Sarawak, lalu tu pulai ngagai Bumiputera empu ulih ke enda nangkup tanggungpengawa ngemansang ke dagang ngagai tikas ti lebih tinggi,” ku iya.

Iya ngarap ke semua komuniti Bumiputera ulih begempung ati dalam ngerembaika dagang di menua Sarawak.

Sama bisi datai Sapit Kepala Menteri Datuk Amar Douglas Uggah Embas, Tan Sri Dr James Jemut Masing enggau ke bukai.