“Nadai pemujur enggau pengelantang datai nganjung diri enti kitai empu enda bebendar.”

SIBU: Pengisuk nyadi pengajar enda nekul pengelandik Maja Amit bedua jam ngintu kebun chabi fertigasi iya di Mukah.

Pengajar SK Engkerbai, Mukah tu ngepunka pengawa nanam chabi chara fertigasi nya enggau 1,000 iti pun belabuh ari taun siti tadi.

Maya pengarang datai ba kebun iya empai lama bisi siti jaku tau ditelah ngagai pengajar 35 taun tu iya nya, landik.

Kebuah pia, ari pemesai kebun iya nya 100 kaki buka panjai 86 kaki chukup mandangka iya landik ngena awak ke bisi kelimpah endang ditemu pengawa nyadi pengajar semampai kisuk laban tanggungpengawa ukai semina di sekula aja tang ‘nitih’ datai di rumah.

LANDIK BEDUA JAM: Pengajar Maja mandangka chabi iya tu udah nyadi.

“Nya enda nekul aku bekebun laban aku endang rinduka pengawa betanam betupi.

“Nyangka enti nadai pengerindu baka tu nanam hybrid chabi fertigasi semina nyadi juluk ati aja tang enda dikereja,” ku iya sambil tuchum nimbal tanya pengarang.

Panjai agi randau enggau iya, ku Pengajar Maja, iya bekenaka belanja urung RM10,000 (ungkup 1,000 pun) enda nyengkaum puku dikena meli sum, vitamin enggau protien.

“Pia mega aku bebelika kereban bukai baka tangki kelimpah ngaji orang ke masang set fertrigasi, kibung, tuat, langkau tangki enggau masang dinding ngena zing spendex,” ku iya maya ditanya sebedau chabi iya nyadi baka kediatu.

Iya madah, maya ngepunka pengawa nya suba, iya bisi ngaji tujuh iku orang.

ENDA LAUN NITIH ORANG: Sebagi ari pun chabi enggi Pengajar Maja.

Udah ditanam, tumbuh galak, diatu iya baka sida ke bukai ti ngereja pengawa nya bela nangika penyakit nyadi ba chabi.

Ku iya, maya musin ujan, penyakit chabi jampat amat ngerekai baka penyakit luluh buah enggau kutu trip daun.

“Kitai nangi amat maya musin ujan laban penyakit chabi jampat amat nyadi.

“Ketegal nya, chara ngintu sereta ngibun enggau manah tauka sistematik meseti dikemeratka kitai,” ku iya nerang.

Bekenang ke diatu maya orang bela ngereja pengawa nanam chabi fertigasi, ku iya, pekara nya enda ngenataika penanggul ngagai sida nyual chabi.

LEBAT: Chabi ke udah tuai.

Iya madah, chabi ke dijual ba serata supermakit di Sarawak mengkang enda chukup tetapika peminta mensia mayuh.

“Nyema semua ke ngemeranka pengawa tu bela nyual magang sereta chukup nitihka peminta ila, kami pechaya chabi tu tau dieksport ngagai menua bukai baka Brunei enggau Singapore.

“Nambahka perintah nengeri endang ditemu sigi ngemeratka pengawa eksport asil betanam betupi ngagai menua bukai alai kami enda nangi dagang chabi ba menua tu,” ku iya madah baru.

Pengajar Maja madah, naka ke diatu taja iya empai nyual tang chabi ke ditanam iya udah bisi orang ngaku meli iya nya orang endur meli paung tauka sida ti nyendiaka leka chabi suba.

Iya mega madah, sebedau belabuh nanam iya bisi ngulu kus pengawa nanam chabi chara fertigasi.

GALAK: Pengajar Maja nanam 1,000 pun chabi.

Ari nya ku iya, iya bulih penemu lalu enda kakang belabuh ngemeranka pengawa nya dikena nyambil kereja tetap iya ke diatu.

Awak tu mega dikena pengarang minta bedua penemu ari iya sentang ulah ke enda tau nadai dikemeran enti deka nyadi orang dagang bepelasarka pengawa betanam betupi.

Ba iya ku iya, ngereja pengawa enda tau diudahka pia aja tang dikeringka enggau pengeliat ati ti nentuka pengawa nyadi mujur.

“Nadai pemujur enggau pengelantang datai nganjung diri enti kitai empu enda bebendar.

“Pia mega anang enda berani napi nama-nama penguji datai nuntung,” pia ku iya ngujungka randau.

Ba pekara bekaul, kebun chabi fertigasi enggi Pengajar Maja kala dilawa sida ti bela ngemeranka pengawa ti sebaka.

Kelimpah ari nya, sida ari Opis Betanam mega kala ngabas kebun chabi iya.