Produser, komposer, pengatur muzik enggau penanyi lagu enggau muzik Dayak patut lebih meras sereta lebih kreatif ba muzik enggau lagu sida.

Anang semina puas ati enggau utai ke udah tang semampai ngiga enggau ngagai utai ti baru enggau lebih nyelai ari selama.

Enggai tauka deka kitai enda ulih enda lebih produktif sereta kreatif ari ti udah.

Proses nyadi penanyi diatu enda sebaka ke suba. Enti suba semua ti nyadi artis rikod dulu ditapis nengah pekit belagu tauka audisyen ba studio rikod.

Jeman 70-an enggau 80-an bedau mayuh studio rikod kelebih agi iya ti diempu kitai Iban.

Lesthiana Kupa Segunggang

Diatu proses nyadi artis rikod chukup mudah asal bisi duit, penau belagu enggau penemu pengawa ngerikod ba studio besai tauka ‘home studio’.

Pemansang teknologi media baka youtube, meda chelak ulih mantu siku- siku orang lebih dikelala enggau nadai sekat.

Kekadang sida ke ngaga lagu single tau nyadi popular enti lebuh lagu sida nyadi viral ba youtube.

Dulu menya artis baru semina bepanggai ba radio enggau surat kabar maya ke deka promo diri empu.

Diatu semua pengawa nya semina bepanggai ba tunjuk jari laban semina milih media ti dikena promo.

Lesthiana Kupa Segunggang

Sekeda orang bisi enda nyadang diri tebilang lebuh lagu sida udah viral ba youtube.

Beethoven Peter terubah chakah bemain gitar (gitar lead) dalam taun 2002.

Maya nya iya bemain muzik begulai enggau raban band Vulture. Kelimpah ari nya Beethoven Peter nyadi siku orang ti ngati kediri bemain gitar begulai enggau pemuzik bukai ba mayuh bengkah pengerami enggau aktiviti.

Album Iban – Bidayuh

Begulai enggau band Vulture, Beethoven Peter mujur ngeluarka siti album Iban – Bidayuh.

Beethoven Peter

Album nya suba dirikod ba studio ‘Era Muzik Iban’ (EMI) ke diempu niang Cobbold John.

Album ke ngundan lagu Iban – Bidayuh nya diberi nama The Vulture; siti chara ti dikena sida ngemesaika nama band kelebih agi ba peminat lagu Bidayuh enggau Iban.

Pengudah pindah gawa ke Semenanjung, Beethoven aktif baru bemain muzik kelebih agi pengudah iya betemu enggau Randy seduai Ricky Ajan sereta enggau raban bukai.

Di Johor Beethoven ukai semina bemain muzik tang iya mega nyadi pengatur muzik tetap ngagai Extreme Music Ptoduction (EMP) sereta dibantu Randy enggau Ricky Ajan.

Ditanya pasal album kompilasyen keterubah iya enggau EMP, Beethoven madah, “Pun penatai runding kami sebuat ngeluarka album kompilasyen tu bepun ari lagu Peransang Kumang ke dulu viral ba youtube.

Beethoven Peter

Peluang nya diguna kami ngaga album kompilasyen ke ngundan lapan iti lagu. Tujuh ari lapan iti muzik ba album nya digaga aku”, Beethoven Peter ke dikelala peminat muzik ketegal pengelandik iya nebah gitar.

Kelimpah ari ngaga muzik ke lagu Iban enggau Bidayuh, Beethoven mega ngaga muzik ungkup artis Melayu.

Nambahka nya, diatu Beethoven Peter benung kiruh nembuka siti album kompilasyen EMP Rising Star.

Nyungkak Kualiti Muzik Dayak

Orang ke semampai mujur sereta mansang ba pengawa iya nya orang ti nengkebang pekara ti baru. Sida tu orang ti enda semina puas enggau siti utai aja tang ngaga utai ti baru.

“Ba aku, enti kitai deka nyungkak kualiti muzik kitai, kitai meseti ngangkatka pengelandik ba diri empu.

Nambahka nya, kitai mega ngubah muzik enggau lagu kitai. Semampai ngaga tauka pansik ba muzik baru. Ngena chara nya kitai ulih ngerembai tauka ngemesaika gawang (skop) muzik enggau lagu kitai”, ku Beethoven Peter.

Siti ari chara pemuzik enggau penanyi ulih nambahka kualiti diri nya nerima penemu enggau chara orang bukai.

Jaku pejah enggau penemu baru ulih nambahka penemu ke endang udah bisi ba diri empu.

Lesthiana Kupa Segunggang siku agi artis baru baruh perabung EMP ke bepalan di Johor Bahru.

Madahka penatai diri ari Song Sarawak, Lesthiana diatu gawa di Singapore. Taja pan pia Lesthiana tetap ulih ngenataika diri enti bisi aktiviti pemerindang di Sarawak.

“Aku terubah datai ba industri pemerindang lebuh aku diasuh nganjung demo lagu ba siti serikat rikod.

Aku benasit laban diterima sida nyadi artis ba serikat nya. Diatu aku benung ba proses nembuka album solo ba EMP”, ku Lesthiana ke ngarapka diri ulih diterima peminat lagu Iban di menua tu.

Entara komposer enggau pemuzik ke mantu Lesthiana ba album solo keterubah tu nya Lalak, Kumang Malaysia (Hillary) enggau Mr Randy.

Diatu Lesthiana bedau ulih meri nama lagu ba album solo iya nya. Taja pia, iya deka bekunsika info nya ba maya ke engkeman udah tu ila.

Nyungkak Kualiti Diri

Lebuh dipinta meri penemu pasal chara ti dikena ngangkatka kualiti artis, Lesthiana madah semua orang bidi chara kediri ba pekara nya.

“Artis nya raban orang ke semampai diperatika orang bukai. Enti perangai enggau asil pengawa sida manah, artis ulih nyadi ke chunto.

“Taja pia enti sida nunjukka pengawa ti enda manah, peminat nyangka enda nyukung pengawa iya ba industri.

“Ba aku, artis patut nyikap diri enggau penemu baru. Sida mega patut nemu nama utai ti nyadi ngelingi sida. Ngena chara sida enda tinggal ari info tauka penemu pasal dunya pemerindang.

Enti ulih anang ninggalka diri ari pemansang orang bukai”, ku Lesthiana bekunsika penemu diri.

Beethoven Peter enggau Lesthiana sama arapka artis baru enggau lama ulih begulai sejalai enggau pangan diri. Kebuah pia ku seduai iya laban kaul ti badas enggau orang bukai ulih mai pemadas ngagai semua ti dikereja.

“Meri besai terima ngagai semua ti nyukung kami duai ba lagu, muzik enggau pekara bukai. Terima kasih ngagai surat kabar Suara Sarawak, dj radio enggau bala bukai ti enda ulih sebut kami duai ditu magang.

“Arap artis, muzik enggau lagu kitai mansang setanding enggau lagu orang bukai”, ku seduai ngujungka randau kami tiga.