KUCHING: Ekonomi Sarawak deka terus ngerembai taja pemansang ekonomi dunya enda entu manah.

Tuai Pemegai Menua (TYT) Sarawak Tun Abdul Taib Mahmud madah menua Sarawak agi ngerikod penumbuh ekonomi ti positif enggau tikas 4.6 peratus ba taun 2018.

“Penumbuh ekonomi ti positif tu muka lebih mayuh agi peluang bedagang enggau pengawa puang ngagai rayat ba menua tu.

“Semua piak patut bekerejasama dalam ngemansangka ekonomi menua Sarawak,” ku iya.

Tun Taib madahka nya rambau Pengawa Beradat Bejadika Aum Kunsil Nengeri Ke-18 Renggat Keempat ba Begunan Dun, kemari.

SEPENEMU…Tuai Pemegai Menua (TYT) Sarawak Tun Abdul Taib Mahmud, Kepala Menteri Datuk Patinggi Abang Johari Tun Openg sereta Speaker Dun Datuk Amar Mohamad Asfia Awang Nassar begambar kenang enggau bala menteri, menteri muda sereta kaban Kelab Penyukung GPS ba penama begunan Dun Sarawak nyerumba Pengawa Beradat Aum Dun Ke-18 Renggat Keempat ditu, kemari.- Gambar Ramidi Subari

Nangkan nya, iya madah dalam kitai ngemansangka Sarawak nyadi nengeri maju sereta bisi penatai pemisi ti tinggi manggai taun 2030, kitai patut bisi beranakka puku ti mayuh enda ngira dalam menua tauka ba luar.

“Peluang beranakka puku dalam mayuh bengkah sektor ekonomi enggau pengelebih besemekih dalam mayuh pekara ti bekaul pengawa beranakka puku di Sarawak.

“Guna agih dikena ngatur pemansang Sarawak laban nya begunaka perambu enggau pengawa ngatur belanja enggau manah,” ku Tun Taib.

Kelimpah ari nya, ku iya, pengawa neritka undang-undang baka Ordinan Ngelumbung 1958 enggau Ordinan Nyual Gis 2016 dikena nentuka pemansang dalam asil minyak enggau gas nyungkak penatai pemisi nengeri tu.

Perintah Sarawak ngaga pemutus ti berani dalam mantaika chukai lima peratus ngagai produk petroleum enggau tuju eksport pemayuh RM 3.8 bilion setaun awakka ulih mantu pemansang menua, ku iya.

“Guna dalam teknologi digital mega deka ngerembaika makit ngagai barang ke dipansutka kitai ngagai menua entarabansa.

“Teknologi digital dalam sektor baka dagang temuai, industri, betanam enggau pemansang mengeri pintar deka terus nambahka pengulih besemekih ba renggat gobal,” ku Taib.

Aum Keterubah Renggat Keempat Dun Nengeri Sarawak Ke-18 deka dipejalai sepengelama lapan hari berengkah kemari 29 April.