“Gawai tu nyadika kelai gaya idup ti patut dikemeran nentuka iya enda punas ngapa lalu rebak biak patut nemu sereta ngelala gaya idup aki ini sida menya.”

KOTA NGABANG, Indonesia: Gawai Naik Dango 2019 Ke-34 di Rumah Radakng Aya’ Kacamatan Ngabang Kabupaten Landak di Kalimantan Barat ditu diintu richah.

Berengkah ari 26 April, bala penyereta ti ditesau datai ngabang nyengkaum 21 kontinjen ari tiga Kabupaten iya nya Kabupaten Kubu Raya, Kabupaten Mempawah enggau Kabupaten Landak di empu datai nedat gawai besai tu, seraya Kabupaten Bengkayang nyadi peninjau enggau pengabang.

Ketuai Komiti Naik Dango, Alpius lebuh dirandau pengudah pengawa bejadi tembu madahka semua renggat atur pengawa udah diputarka bala komiti sida lalu atur pengawa udah tu nyelinting mayuh pekit seni budaya ti disereta 21 kontinjen ari tiga Kabupaten ngerichahka gawai.

“Dikearap atur pengawa Gawai Naik Dango tu lanchar, bulih berekat baka ti disampi sereta likun dalam ibun Djubata.

BERAMI… Bala pemesai nyempulang rayat ngerami Gawai Naik Dango 2019 Ke-34.

“Sebedau pengawa bejadi tu, bala komiti mega bisi ngatur seminar enggau karnival nbudaya ti digulu semua kontijen ke alai tu nyadi pelasar meransang sida ngemeranka enggau nali adat enggau gaya idup sida ke tuai,” ku iya.

Alpius mega ngarapka Gawai Naik Dango ti deka diintu di Kabupaten Mempawah ba taun baru deka richah agi sereta mantaika mayuh agi main asal enggau budaya raban bansa Dayak di menua tu.

“Gawai tu nyadika kelai gaya idup ti patut dikemeran nentuka iya enda punas ngapa lalu rebak biak patut nemu sereta ngelala gaya idup aki ini sida menya,” ku iya madah nyemetak.

Berebak enggau nya, Ketuai Dewan Adat Dayak (DAD) Kabupaten Landak, Heri Saman lebuh dirandau media mega madahka Gawai Naik Dango sekali tu iya nya pengawa diintu ninting taun raban bansa Dayak Kanayank di tiga Kabupaten nya.

Ku iya, Gawai tu jaku dikena meri terima kasih ngagai Djubata ke asil padi ke alai raban bansa Dayak ti nyadi raban bumai ninting taun ngintu adat tu.

NYELAI… Gaya piring bansa Dayak Kenayank ti nyempulang benih padi ti dianjung ngagai Rumah Dango Padi ngambika diberekat.

Kelimpah ari nya ku iya, tuju raban bansa Dayak ngintu Gawai tu mega laban deka nanggam kaul kaban belayan sama datai ari bansa Dayak di tiga Kabupaten.

“Berindik ari Kabupaten Landak nyadi tuai pengatur Gawai taun tu, aku nyadi Ketuai DAD Kabupaten Landak meri besai terima kasih ngagai pemerintah Kabupaten Landak ti udah besaup ngemujurka gawai tu,” ku iya nyimpul.

Sama datai pengari Gabenor Kalimantan Barat Ria Norsan, Bupati Landak Dr. Karolin Margret Natasa, pengari Bupati Landak Herculanus Heriadi, Bupati Mempawah Erlina Norsan, Bupati Sekadau Rupinus enggau Kaunsil Majlis Adat Dayak Nasional, Cornelis sereta 20 iku pengabang ari raban bansa Dayak Sarawak enggau pengabang bukai.

MANAH… Sekeda ari pengari kontinjen narit ati bala pengabang Gawai Naik Dango taun tu.

 

TIMPAI KENANG… Pengabang ari Sarawak mega enda muai awak begambar ungkup kenang begulai enggau bala menyadi Dayak di Kabupaten Landak ditu.