KUCHING: Dalam ngatur langgur pemansang mengeri, raban ketuai patut meri fokus ngagai kualiti pengidup enggau pemaik rampa menua ti nyamin pengerai rayat.

Tuai Pemegai Menua (TYT) Sarawak Tun Abdul Taib Mahmud madah penyampau rayat ti nambah diau ba kandang mengeri deka nyungkak pemansang ekonomi enggau mengeri.

“Naka tu lebih 58.5 peratus rayat Sarawak diau ba kandang mengeri lalu penyampau tu mai mayuh pemar ti patut diputar enggau manah.

“Nengah konsep Mengeri Lantang patut terus dipejalaika dalam ngatur perambu mengeri lalu kitai patut terus ngetanka adat enggau adat ngambika terus dipejalaika taja gaya pengidup makin moden,” ku iya.

Tun Taib madah munyi nya rambau Pengawa Beradat Bejadika Aum Kunsil Nengeri Ke-18 Renggat Keempat ba Kompleks Dun ditu, kemari.

BERI BASA…TYT Sarawak Tun Abdul Taib Mahmud enggau bini iya, Toh Puan Datuk Patinggi Ragad Kurdi Taib bejalai ba mua panggau seraya disempulang bala pemesai rambau Pengawa Beradat Bejadika Aum Kunsil Nengeri Ke-18 Renggat Keempat ba Begunan Dun, kemari. Bela dipeda Kepala Menteri Datuk Patinggi Abang Johari Tun Openg, Speaker Dun Datuk Amar Mohamad Asfia Awang Nassar, Datuk Amar Juma’ani Tun Tuanku Bujang, Sekretari Perintah Nengeri Tan Sri Datuk Amar Mohamad Morshidi Ghani enggau Datin Amar Fatimah Mohd Iskandar.-Gambar Ramidi Subari

Nangkan nya, iya madah dalam dunya ti begunaka aplikasyen teknologi digital, rayat tau bulih mayuh bengkah infomasyen bekaul enggau servis perintah nyengkaum media rama.

“Tagit rayat ngagai perintah diatu majak tinggi, lalu rayat begunaka timbal ti jampat ari ejensi perintah dalam mayuh bengkah isu lebih agi ba online.

“Pia mega, pemansang modal mensia pekara ti chukup beguna dalam kitai ngemansangka sosio ekonomi Sarawak,”ku iya.

Sekula ti likun sereta lantang patut disediaka ungkup nembiak menua tu lebih agi ba menua pesisir laban sida tu deka nyadi ketuai jemah ila, ku Tun Taib.

“Kelimpah ari nya, fokus ngagai raban seranta patut diperatika enggau manah lalu kitai patut bisi projek khas ngambika ulih nyapai objektif enggau penguntung ngagai sida ke ditagit.

“Rayat ti seranta patut diberi bantu nengah program latih pengelandik enggau program nambahka penatai pemisi lalu semua piak patut bekerejasama ngambika projek ngemunaska penyeranta ba menua tu,”ku iya.

Nya alai, iya nangkan sediaka pengawa puang enggau dagang dikena nangkup peminta rayat ti majak nambah.