Hak ke udah lenyau patut dipulaika nengah jalai ti betul

“Aku berasai siru beratika pengeransing Perintah Nengeri berunding enggau Perintah Besai bekaul juluk mulaika baru hak-hak Sarawak bepelasarka Sempekat Malaysia 1963.”

KUCHING: Sempekat Malaysia 1963 (MA63) nyemetak nyebut Sarawak nyadi siti ari wilayah dalam Malaysia lalu pekat nya patut dipebasa, ku Tuai Pemegai Menua (TYT) Sarawak Tun Abdul Taib Mahmud.

Ku iya, pekara bekaul enggau hak ke udah lenyau patut dipulaika Perintah Besai nengah jalai tu betul.

“Aku berasai siru beratika pengeransing Perintah Nengeri berunding enggau Perintah Besai bekaul juluk mulaika baru hak-hak Sarawak bepelasarka Sempekat Malaysia 1963.

KAMI NEGIKA HAK SARAWAK…TYT Sarawak Tun Abdul Taib Mahmud, Kepala Menteri Datuk Patinggi Abang Johari Tun Openg, Sapit Kepala Menteri, Speaker DUN, Sekretari Perintah Nengeri Tan Sri Datuk Amar Mohamad Morshidi Ghani begambar kenang enggau bala menteri, menteri muda sereta bala Adun beserimbai enggau Pengawa Beradat Bejadika Aum Kunsil Nengeri Ke-18 Renggat Keempat ba Begunan Dun, kemari.-Gambar Ramidi Subari

“Aku pechaya, nengah komiti ke udah ditumbuh ulih nyadi jalai ti pemadu manah dikena ngulihka baru hak ke udah lenyau,” ku iya.

TYT mansutka pekara nya rambau Pengawa Beradat Bejadika Aum Kunsil Nengeri Ke-18 Renggat Keempat ba Begunan Dun, kemari.

Nangkanka nya, Tun Taib madah semua piak ke bisi sama dalam komiti perunding nya deka terus negika hak Sarawak enggau agenda pemansang ti mungkur semua pekara.

“Semua piak enda ngira penemu dalam politik patut terus nyukung polisi dibaruh iring Kepala Menteri lebih agi bekaul enggau penemu mulaika baru hak Sarawak bepelasarka MA63.

“Menua Sarawak siti menua tu ti lantang laban rayat ba menua tu terus bejalaika pengidup ti enda bechiping, bebasa sereta nelap enggau pangan diri,” ku iya.

Berebak enggau nya, Tun Taib madah penyerakup tu mih nyadi pengering ngujungka nengeri Sarawak terus tegap sereta mansang dalam sosioekonomi lalu rayat Sarawak patut pintar sereta enda mudah ulih panjuk agenda negatif ti nguji deka mechahka pengelantang enggau penyerakup ke ditanggam kitai ngelama tu.