KUCHING: Rayat Sarawak patut besaup sereta seati penemu mulaika baru hak ke udah lenyau seriris enggau Sempekat Malaysia 1963 (MA63).

Sapit Kepala Menteri Datuk Amar Haji Awang Tengah Ali Hasan madah tu beguna amat ngagai kitai ngambika kitai ulih ngetanka hak kitai bepelasarka MA63.

“Tu beguna amat ungkup pemansang ari sukut infrastruktur.

“Ukai semina nya, kitai mega ulih ngemansangka pekara bukai nengah MA63,” ku iya.

Awang Tengah madah munyi nya rambau ditemu raban media pengudah Pengawa Beradat Muka Aum Renggat Keempat Kunsil Nengeri Sarawak Ke-18 ti dipenyadika Tuai Pemegai Menua (TYT) Tun Abdul Taib Mahmud ba Kompleks Dun Sarawak, kemari.

Datuk Amar Awang Tengah Ali Hasan

Nangkan nya, ku Awang Tengah, Tun Abdul Taib mega beratika guna bala nembiak ari sukut pengelandik teknikal enggau pelajar ti ulih mai pemansang ngagai ekonomi.

“Tu endang ngena bendar laban kitai dekaka pengelandik dalam pengawa engkeman enggau ekonomi digital dalam ngemansangka industri 4.0.

“Ba jaku iya tadi mega, dia Tun Abdul Taib madah kitai patut beratka pengawa nyaga rampa menua lalu pemansang kitai patut disebelaka enggau guna pemansang nya sereta guna rampa menua asal,” ku iya.

Udah nya, Awang Tengah madah TYT chukup meratka guna kitai ngambika ulih terus segulai sejalai dalam nyaga pengelantang enggau bala bukai.

Aum Keterubah Renggat Keempat Dun Nengeri Sarawak Ke-18 deka dipejalai sepengelama lapan hari berengkah ari sehari tu (kemari) 29 April lalu mayuh mosyen deka dipejuraika rambau aum tu ila.