KUCHING: Perintah Sarawak nengah Kaunsil Multimedia Sarawak (SMA) udah nyendiaka 60 batang tiang telekomunikasyen di sitak Sri Aman .

Menteri Muda di Opis Kepala Menteri (Pengawa Korporat) Abdullah Saidol madah projek tu deka dipejalai nengah inisiatif SMA300.

“Tiang telekomunikasyen dipelaba deka tembu suku ketiga taun tu.

“Ungkup perambu timpuh panjai, urung 300 agi batang tiang telekomunikasyen deka tembu didiri di selampur Sarawak dalam taun baru,” ku iya.

Abdulllah Saidol mansutka jaku nya lebuh nyaut tanya Adun Lingga Simoi Peri bekaul enggau perambu timpuh panjai enggau timpuh pandak nambahka peneras internet di kandang menua Seduku, Lingga, Stumbin, Maludam enggau sekeda bagi menua di Sri Aman rambau Dun renggat kedua, tadi.

Nangkan nya, Simoi mega bisi nanya sekalika SMA bisi perambu deka numbuhka palan komuniti di kandang menua pesisir.

Nyaut tanya nya ku Abdullah Saidol, sida bisi merambu numbuhka palan komuniti dia.

“Tang kami deka berati pengulih palan internet komuniti tauka Micro Hub Innovation ba sebengkah palan ke dipilih.

“Tu mega deka dipujur pengudah perintah bejalaika pansik taba ti engkeman numbuhka palan internet komuniti tu,” ku iya.

Kelimpah ari nya, lebuh nyaut tanya Adun Lingga bekaul enggau langgur penemu SMA deka numbuhka hab inovasyen di Maludam, ku Abdullah Saidol, sida deka numbuhka palan nya di Sri Aman.

Perintah deka beratika pemesai guna palan ditumbuh tu enggau dini taba ti patut kelimpah berundingka guna palan tu di menua pesisir, ku iya.

Seraya Adun Tupong Fazzrudin Abdul Rahman nanya sekalika perintah bisi runding deka ngemujurka Projek Kampung Wifi tauka projek ti sebaka enggau nya nentuka sambung internet ulih dikena semua komuniti nyengkaum genturung pendiau di menua pesisir.

Ku Abdullah Saidol, Projek Kampung Wifi dipejalaika Perintah Besai lalu kunterik projek nya udah abis timpuh dalam taun 2017 sereta udah diketu.

“Perintah Sarawak nengah SMA benung bejalaika projek SMA300 ti deka nyendiaka infrastruktur servis 3G enggau 4G di menua pesisir.

“Nengah projek tu mega, mensia mayuh kelebih agi peranak menua pesisir deka lantang agi bekenaka servis wifi sereta internet ti bisi kualiti,” ku iya.

Adun Tupong mega betanya sekalika agi bisi kandang menua apin dibungkur servis internet 4G lalu baka ni chara mutarka penanggul tu.

“Pengawa tu bepanggai ngagai raban pengatur dagang bekaul lalu SMA deka seruran ngaul diri nentuka bala operatir ulih nambahka kualiti enggau pemanah servis internet nadai ngira di kandang mengeri tauka menua pesisir,” ku Abdullah Saidol nyaut.