Gawai Adat Naik Dango 2019

KOTA NGABANG, Indonesia: Lebih 5000 iku nedat Radakng Aya’ ngulu Gawai Adat Naik Dango Ke-34 ti diatur Kabupaten Landak ditu.

Gawai tu keterubah diintu dalam taun 1985 di Kacamatan tauka Pelilih Mandor dipegai Kabupaten tauka Bagi Menua Mempawah di Provinsi tauka Wilayah Kalimantan Barat lalu diintu 27 April ninting taun.

Kelai Terima Kasih

Diintu pengudah raban orang bumai tembu ngetau enggau merekat benih padi ti deka ditanam taun baru sereta kelai meri terima kasih ngagai Djubata tauka Petara ketegal udah merekat pengawa sida bumai betaun, bulih panen tauka padi, bulih puli.

PENGARI MENUA… Bala pengabang ari Sarawa diuluka Pak Abet Sego enggau Victor Ason nurun ngabang Gawai Naik Dango ngagai Rumah Radakng Aya’, Kota Ngabang ditu.

Baka kitai raban bansa Iban mega, bansa Kenayank ti majoriti diau di menua adap Kalimantan Barat tu madahka padi ngemai reti chukup besai ti nyadika pun pengidup.

Bansa Kenayank pechayaka padi tu diturunka Djubata ari langit nyadika pemakai mensia di dunya lalu patut dipebasa laban tu ngidupka seput sida.

Nya kebuah Gawai Naik Dango didiri dikena mantaika terima kasih besai ke rejeki diberi Djubata kelimpah makai serumpu sekayu menua makai asi baru.

Nali Adat

Kenu ku Ketuai Panitia tauka Komiti Gawai, Alpius madahka pengawa tu endang meruan adat sereta ripih pengawa ti enda tau enda diintu baka ti ditampung ari sida ke tuai menya.

BASA… Adat dikena ngelalu penatai bala pemesai Gawai Naik Dango 2019 Ke-34.

“Serap menua dipegai Wilayah Kalimantan Barat deka nganjung tangkai padi sida ngambika digempung lalu diengkah dalam Rumah Dango Padi tauka ulih dikumbai kita di Sarawak din Tibang Padi.

“Pengawa nganjung tangkai padi tu ke nyadi batang pengawa Gawai Naik Dango seraya ngempung raban bansa Dayak ke diau ngachir di menua tu begulai ngerami gawai besai kami.

“Benih ari tangkai padi ti dianjung tu mega deka disadung ngagai raban bumai lalu deka nyadika benih padi pun sida ba taun baru,” ku iya ngelansa.

Iya mansutka jaku tu lebuh Pengawa bejadika Gawai Naik Dango Ke-34 Kabupaten Landak di Kota Ngabang seraya ngelalu penatai bala pengabang, kemari.

Sama bisi datai pengari Gabenor Kalimantan Barat Ria Norsan disempulang bini iya ti mega Bupati Mempawah Erlina Norsan, Presiden Kaunsil Adat Dayak Nasional Cornelis, Wakapolda Kalimantan Barat Sri Handayani, Bupati Landak Karolin Margret Natasa enggau Bupati Sekadau Rupinus sereta bala pemesai bukai.

KELAI TERIMA KASIH… Jaku pengelalu ari Bupati Landak Dr. Karolin Margret Natasa.

Nyungkak Ekonomi

Gawai diatur tiga hari berunggu berengkah ari 26 nyentuk 28 April mega nyadi pelasar raban bumai ngiga belanja tambah ari awak bedagang bemacham produk kraf jari, pemakai asal enggau produk bukai kelimpah ulih mantaika gaya idup enggau main asal ngagai orang luar.

“Berengkah ari pengawa mandang, bekunsi penerang enggau bejualka asil kraf jari tu ukai semina ulih nambahka penatai pemisi sereta nyungkak ekonomi ruang bilik sida ke ngemeranka pengawa tu tang mega ngerapitka sintal tanggam kaul laban kaban belayan ari menua bukai datai berami kitu.

“Tembu ngetau alai raban bumai belepa ari pengawa di tanah. Sida ke indu ti tau jari deka nengkebang kraf jari kelebih agi ari manic, betenunka kain, ngaga baju burung, kereban ngepan indu enggau lelaki.

“Sida ke lelaki mega enggai tinggal, bela kiruh ngambuh ilang, duku, sangkuh, ngaga enggau ngukir terabai enggau ke bukai,” ku siku ari malin temuai, Pak Abet.

KELAI… Pengawa ngesan replika rumah Dango tauka gudang nyimpan padi ti nganjung tangkai padi ngagai Dango Padi ngambika diberekat.

Basa Pengabang

Penatai bala Pengabang diuluka Pak Alim Sego ngarika komiti Bidayuh enggau Victor Ason ngarika komuniti Iban – Serakup Dayak Sarawak (Pedas) enggau Dayak Bukit Kelingkang (DBK) ari Sarawak mega diberi basa nengah adat ngelalu pengabang.

Bala komiti pengatur chukup lantang meda sukung enggau pengiruh bala pengabang datai ari jauh ngulu pengawa besai bala menyadi di menua tu sereta ngarapka pemanah tanggam kaul baka tu seruran ditanggam rat dataika jemah.

“Kaul kitai Dayak ke diau di Kalimantan enggau Sarawak endang agi ditanggam rat. Aki ini kitai menya sigi ngundang, bedarat nujah kampung napatka pendiau pangan diri.

“Diatu kitai dekaka pengawa baka nya diidupka baru, ari pemisi jalai penyambung ke meruan agi diatu dikearap ulih meransang kitai ngusung kaban belayan ba kededua menua,” ku Pak Abet madah nyemetak.

Bemacham atur pengawa bisi diatur ngerichahka Gawai Naik Dango kelimpah ari ripih adat gawai nya empu baka pengawa mandang, bangsal bejual, lumba rayat, pekit seni enggau ke bukai.

MAKAI SERUMPU… Adat basa bansa Dayak dikena masa bala pengabang baka ti ditampung ari aki ini menya.

 

NAMBAHKA BELANJA… Sekeda ari pengawa bejualka kraf jari entara pematak penatai bala temuai sereta ngerichahka agi Gawai Naik Dango 2019.

 

SIRUKA RAYAT… Bala pemesai ari selampur menua nyempulang rayat renggat baruh ngintu gawai besai bansa Kenayank di Kota Ngabang.

 

ADAT… ripih atur Gawai Adat Naik Dango 2019 Ke-34.

 

KAUL TEGUH… Pengabang ari Sarawak nyelimpangka awak diri begambar enggau bala penyereta nganjung benih baru ngarika menua sida.

 

NGANJUNG BENIH… Sida ke nganjung benih niki ke Dango Padi.