KUCHING: Mayuh bengkah pekara deka diperati sebedau perambu begulaika sekula dipejalai.

Ku Menteri Muda Pelajar, Sains enggau Pansik Teknologi, Dr Annuar Rapaee, pengawa begulaika dua buah sekula iya nya SK Kuala Nyalau enggau SK Kampung Nyalau, ukai pengawa muntang tang patut nengah sebengkah atur sebedau sekula nya dipegulai.

“Sebedau pemutus ditetap, kitai patut dulu agi nanya runding bala komuniti ke diau besemak kededua buah sekula kelebih agi apai indai nembiak sereta ngelala taba ti meruan endur ngentak sekula nentuka penusah tanah tusur tauka penusah ngenyit bukai nyadi baru.

“Kitai mega patut nentuka taba sekula baru dientak ila datai jalai enggau ulih disikap ngena bekal ai enggau kuasa karan,” ku iya.

Dr Annuar mansutka jaku nya lebuh nyaut tanya ari Adun Samalaju Majang Renggi bekaul enggau pengawa begulaika dua buah sekula, SK Kuala Nyalau enggau SK Kampung Nyalau ketegal penanggul suntuk nembiak besekula dia.

Aum Kunsil Nengeri (Dun) Sarawak Ke-18 baum ba hari keterubah pagi tadi.

Adun Samalaju mega bisi mantaika tanya berapa buah sekula diperambu deka dipegulai nyadi sebuah sekula aja.

Naka diatu ku saut Dr Annuar, sepenyampau 823 buah sekula napi penanggul suntuk nembiak.

“Langgur penemu begulaika sekula tu beguna amat ukai semina ungkup pemujur sekula aja tang mega ngaul pekara pelajar.

“Sebedau perambu tu dipujur, kitai deka berandau enggau apai indai sereta bala komuniti ke diau besemak sekula tu, ngempung penemu sida,” ku iya.

Pia mega ku penemu Dr Annuar, SK Kuala Nyalau enggau SK Kampung Nyalau, bisi sebaka nama sereta patut dipegulai belalauka peminta penyampau tubuh nembiak mimit ari 150 iku.

SK Kuala Nyalau bisi 147 iku nembiak enggau 14 iku pengajar seraya di SK Kampung Nyalau bisi 84 iku nembiak enggau 14 iku pengajar, ku iya.

Taja pia ku Dr Annuar nyaut tanya ari Majang bekaul enggau status deka begulaika kededua sekula nya, opis menteri sida apin bisi sebarang perambu sentang pekara nya.