KUCHING: Atlit nyemerai Malaysia, Welson Sim Wee Sheng nerima insentif RM 91,500 ari Perintah Sarawak.

Insentif nya diberi Menteri Dagang Temuai, Seni, Main Asal, Nembiak enggau Lumba Menteri Datuk Abdul Karim Rahman Hamzah di Dun, kemari.

Abdul Karim madah Welson napi penanggul belatih di Kuala Lumpur lalu lantang agi belatih enggau pematih iya di Melbourne, Australia.

“Opis Menteri Nembiak enggau Lumba Malaysia suah madah suntuk belanja dikena mantu bala atlit, nya kebuah perintah Sarawak bisi ngasaika tanggungpengawa meri bantu belanja ngagai Welson dikena iya belatih,” ku iya.

Ku Abdul Karim, atlit Sarawak ke bukai baka Jonathan Nyepa mega diberi bantu belanja.

Welson lebuh dirandau pengarang berita madahka Kaunsil Lumba Nengeri Sarawak mayuh mantu iya ari sukut belanja kenyau ari pun taun tu.

“Ari insentif tu, aku ngarapka diri ulih nyingkang jauh agi sereta matuh diri empu nyulut agi maya belatih di Australia,” ku iya.

Welson siku atlit nyemerai ti baru menang empat midul emas enggau dua midul engkeraju rambau pekit nyemerai tebuka Malaysia dua hari ke udah.

Ba pekit nya, Welson mujur mechah rikod 100 meter nyemerai gaya ngatika diri enggau 49.54 sekend.

BEJAKU… Welson lebuh dirandau raban pemberita ba Dewan Undangan Nengeri (Dun), kemari.