KUCHING: Zaiedi Suhaili sekali agi dichalun Dun Sarawak nyadi Senator lalu nampung tanggungpengawa nyadi Senator di Aum Parlimen.

Nama Zaiedi dichalun nyadi Senator dibantaika Sapit Kepala Menteri Datuk Amar Awang Tengah Ali Hasan rambau aum hari kedua aum keterubah penggal keempat Dun Sarawak ke-18 ditu, kemari.

Ku Awang Tengah, Zaiedi udah nganjung penerang betulis ngagai Sekretari Dun Sarawak kelai iya setujuka diri dichalun ba pengawa bepilih ngagai Aum Parlimen belalauka Perkara 45 (1) (a) dibacha enggau Jadual Ketujuh Konstitusyen Perintah Besai.

Pia mega ku Awang Tengah, enti dipilih Dun Sarawak, Zaiedi setuju nampung pengawa nyadi Senator ba penggal kedua.

“Zaiedi udah nangkup atur peminta ditetap dalam Perkara 47 (a) Konstitusyen Perintah Besai ngambika dipilih baru nyadi kaban Aum Parlimen.

“Kelimpah ari nya, Zaiedi udah mantaika diri nyulut lebuh gawa enggau Sarawak kenyau ari dipilih nyadi Senator,” ku Awang Tengah.

Zaiedi ada kena 30 Disember 1955 lalu bisi peneleba ngatur pengawa enggau politik ti besai, nerima degree keterubah Sarjana Muda Sains Sosial (Kepujian) ari Universiti Sains Malaysia (USM).

Udah nya iya gawa nyadi staf perintah 11 taun pengelama sebedau dipadu gawa nyadi Sekretari Politik ba bemacham Opis Menteri Perintah Besai pengelama semilan taun kelimpah dichiri nyadi Kaban Kaunsil Mengeri Padawan (MPP) taun 2009.

Kena 26 April 2014, Zaiedi dipadu mangku pengawa Sapit Chairman Kaunsil nyentuk 30 Jun 2016 sebedau dipilih Dun Sarawak nyadi Senator dalam timpuh tiga taun ari 19 Julai 2016 nyentuk 18 Julai 2019.

Dulu ari nya, Zaidei gawa nyadi Kaban Kaunsil Direktor Kaunsil Ai Kuching ari April 2007 nyentuk Mac 2009.

Zaiedi chakah ngaul diri dalam politik kenyau ari taun 1988 ke alai iya nyadi Kaban komiti Pampang Satok Nembiak PBB ari taun 1988 nyentuk 1991, Ketuai Nembiak PBB Tupong (1992-1995) lalu diatu nyadi Chairman Sapit Pampang PBB Tupong pengudah dichiri dalam taun 1996.

Berebak enggau nya ku Awang Tengah, taja mangku pangku pengawa besai tang Zaiedi udah nyulut sereta nyadi teladan ngagai bala komuniti ba mayuh bengkah gerempung ukai dikuasa perintah enggau ngintu pengelantang.

Awang Tengah ke mega Menteri Industri enggau Pemansang Pengawa Dagang andal enti Zaiedi dipilih baru Dun Sarawak nyadi Senator ngari Sarawak di Aum Parlimen, deka seruran keran gawaka pengelantang rayat Sarawak.

Iya mega andal amat Zaiedi deka seruran negika pemerat Sarawak dikena nyaga hak Konstitusyen Nengeri ba Aum Parlimen.