Seliah diri ari dadah, penyalah siber – Ali Biju

SARATOK: Nembiak sekula ditangkan enda ngereja sebarang ulah enda menuku ti tau ngerusak idup sida dudi hari.

Jaku tangkan tu dipansutka MP Saratok Ali Biju lebuh bejadika Licha Sivik Renggat Nengeri Sarawak ti diatur ba Balai Seri Semerbak, SMK (BM) Saratok ditu tadi.

“Anang deka tauka berani nguji enggau orang ngereja ulah enda menuku, bepakaika dadah, alah penemu enggau umbuk orang ba dunya siber tu laban ngerusak idup kita jemah.

“Dadah enggau penyalah siber tu entara kes pemadu mayuh nyadi kemaya hari, nyauka ninting hari kitai ninga rita pasal ditan enggau ripot ngaul ‘love scam’ tu,” ku Ali madah nyemetak.

Ku Ali, baka penerang ti udah dikunsi tadi, kitai apai indai mega patut beratika ulah anak, matau pejalai sida enggau orang ti enggau sida bebakih.

PEMAIK… Ali (tiga kiba) disempulang Florence (dua kiba) enggau bala bukai begambar bebala mayuh pengawa tembu atur Licha Sivik ba SMK (BM) Saratok, tadi.

Sida ke nembiak benung mansang besai endang ditemu rindu ngujika pekara baru kelebih agi maya dibai bala bakih.

Kebuah pekara tu berat amat laban udah ngelekai ngagai kandang menua pesisir lalu bala nembiak kitai di sekula mega bisi udah ditemu enggau ditan gian dadah, nginsap, nginsap gam enggau ngereja ulah enda menuku ke bukai.

“Tu tau ngasuh juluk menua kitai deka nempa modal mensia ti meruan, rebak ti nampung pengawa nyadi ketuai dudi hari puntan.

“Kitai udah ngelempaika pengandal ngagai rebak ke diatu nampung pengawa ngemansangka menua, nyadi chunto enggau teladan rebak dudi,” tandu Ali.

Nya alai iya ngansak bala nembiak berengkah ari diatu, punaska ulah gian dadah, anang kelalu masau jam bepedaka media rama tang beratka pelajar.

“Bala apai indai enggau pengajar sereta komuniti mega patut bekerejasama enggau besaup nyeridi ulah bala anak ngambi nyadi orang ti menyana, nyulut ba pelajar,” ku Ali nyimpul randau enggau Suara Sarawak.

Sama bisi datai Direktor Pemadah Saratok Florence Sebastian Unting ti datai ngarika Direktor Pemadah Sarawak.

Pengawa mandang malin penerang pasal penyalah gian dadah enggau penyalah siber ‘love scam’ mega bisi diatur nyerumba atur program sehari nyentuk tu.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak