KUCHING: Projek Skim Kuasa Karan Alternatif Menua Pesisir Sarawak (SARES) deka meri pemaik ngagai 312 ruang bilik di rumah panjai sitak Sungai Mujok di Julau.

Menteri Muda Elektrik Menua Pesisir, Datuk Dr Abdul Rahman Junaidi madah pasal pengawa nampung projek SARES beungkus RM19 juta tu lebuh nyaut tanya Rolland Duat Jubin (Meluan-PDP) ba hari ketiga Aum Dun Ke-18 Renggat Keempat tadi.

“Pperintah Sarawak endang deka nampung projek tu ngagai 12 buah rumah panjai di sitak Sungai Mujok.

“Projek tu dipelaba berengkah dipejalai dalam taun 2020 lalu disadang tembu dalam timpuh lapan bulan.

“Pengawa nyambung tali karan di sitak menua nya ila deka ngena panel solar enggau sistem mikro hidro,” ku iya nerang.

Datuk Dr Abdul Rahman Junaidi

Berebak enggau nya, Abdul Rahman mega nyaut tanya Alexander Vincent (Ngemah-PRS) pasal projek SARES ti nadai mungkur genturung pendiau di Nanga Kajah enggau Lubok Tanjung.

Kebuah pia ku iya, laban dua bengkah genturung pendiau tu deka disambung ngagai sistem grid pengudah Extra High Voltage (EHV) Kanowit tembu digaga ujung taun 2020.

“Bekal kuasa karan 24 jam deka disambung ngagai genturung pendiau enggau rumah panjai ti apin disambung ngagai sistem grid.

“Projek beungkus RM105 juta tu deka dipejalai dalam bulan tu,” ku iya madah nyemetak.

Pia mega ku iya, bekal kuasa karan ba genturung pendiau bukai deka disambung kandang dua taun deka datai nengah pelin besai kuasa karan menua pesisir ti dipelanja Perintah Nengeri.
-abis-