KUCHING: Perambu ngaga jematan meraka Sungai Lengan patut diperunding perintah Sarawak.

Ku Adun Daro, Safiee Ahmad, jematan tu patut digaga ngambi rayat ke diau dia muntang mindah bedaja asil betanam betupi sida ngagai pasar besemak.

“Bala nembiak sekula mega lantang nurun enggau pulai ari sekula laban ngelama tu sida semina nengah jalai sungai ti enda likun ditengah.

“Perintah nengah Opis Kereja Raya patut berundingka pekara tu laban di menua nya bisi lapan genturung pendiau enggau sebuah sekula diselara sebatang sungai,” ku iya.

Safiee mansutka pekara tu lebuh ngelansa perambu bisi dibantaika Tuai Pemegai Menua (TYT) Sarawak nyerumba Pengawa Beradat Bejadika Aum Keterubah Renggat Keempat Kaunsil Nengeri Sarawak.

Safiee Ahmad

Iya mega minta Opis Bekal Ai Menua Pesisir (JBALB) ulih nyambung bekal ai beresi ngagai menua nya.

“Taja sida tu udah ulih dilawa nengah jalai alun ti semina beberapa kilometer aja ari mengeri Sibu, tang agi begunaka ai ujan tauka sungai.

“Tu dikena sida ngintu ruang bilik enggau pengawa bukai sereta suah napi penusah suntuk ai maya musim kemarau,” ku iya.

Kelimpah ari nya, Safiee minta pengawa puang Pemesai Narkotik di IPD Matu Daro diisi lalu dianjung gawa ngagai Opis Pelajar Pelilih Menua (PPD) nadai ngira gred nyengkaum PPD Daro.

“Opis Ejensi Anti-Dadah Nasional (AADK) mega patut ditumbuh di genap pelilih menua enggau nengeri tu nyaup ngemunaska ulah gian dadah enggau ngasi agi.

“Aku suah amat nandu pekara tu tang penanggul salah guna dadah majak nyadi kelebih agi di sekula, ladang sawit enggau genturung pendiau bukai.

“Penanggul baka tu nyau baka enda dikeibuhka ejensi bekaul taja perintah udah mansutka penerang dadah tu munsuh lumur satu menua,” ku iya.