BAU, Kuching: Basa enggau penyiru begulai enggau pangan diri ngasuh kaul kitai bansa Dayak di Sarawak enggau tanah Kalimantan ditanggam rat.

Penatai bala pengari ari Dewan Adat Dayak (DAD) Kota Ngabang nerima tesau ngulu Pengerami Hari Bung Bratak ditu pagi kemari kelai kitai bansa Dayak endang beratka pemanah kaul taja bebida menua.

Iin Normanika, 34 taun enggau Cresensia Linda, 42 taun, datai kitu ngarika raban DAD malas duruk raban Adatasal Bidoyoh Sarawak ti udah dulu nuruk sida lebuh Gawai Adat Naik Dango di Kota Ngabang, Kabupaten Landak kena 26 ngagai 28 April tu tadi.

Ku Iin, diberi awak nemuai kitu ngulu pengerami besai Dayak Bidayuh nyadi basa chukup besai ngagai sida.

“Aku berasai chukup temegah lebuh dipinta nyadi pengari DAD ngulu pengerami besai seraya nemuai ngagai bala menyadi di Sarawak.

KELAI PENYIRU… Palan Pesaka Asal Bung Bratak (BBHC) ngundan mayuh jerita penatai asal bansa Bidayuh ari Sungkong di Kalimantan Barat, Indonesia lebih 700 taun ke udah.

“Tambah mega bai ati agi belala begulai, gauk ke pangan diri lebuh Gawai Adat Naik Dango apin lama ke udah ngasuh ati gagit amat kitu,” ku Iin lantang.

Ku Iin, pengerami mantaika main asal enggau gaya idup dikemeran aki ini menya baka tu manah amat nentuka rebak baru nemu sereta ngelala adat asal kitai.

Taja pia ku Iin, siti pekara ngasuh ati iya alit laban nadai entu mayuh bansa Dayak ke ngempu pengerami bekenaka pekayan asal bansa sida lalu pekara tu patut diperati.

“Ari perati sepanjai atur pengerami semina dua tiga iku aja ngerasuk pekayan asal kelebih agi bansa Bidayuh di Bau ditu kelimpah ari sida ti merindang ngena tanda asal enggau bala pemekit Dayung Sangon,” ku Iin.

Nangkan nya ku Iin, ngemai ati berani ketegal penyiru enggau beratka pekara adat enggau pesaka asal kitai bansa Dayak ke alai iya ngemai pekara nya ngagai piak ti patut.

MALAS DURUK… Iin (duduk kiba) enggau Linda (duduk dua kanan) begambar enggau bala pengabang Gawai Adat Naik Dango ti dulu nuruk raban ari DAD.

“Pekara tu mega udah dibantai ngagai Datuk Pete Minos empu ke nyadi Chairman Palan Pesaka Asal Bung Bratak (BBHC) laban ba penemu aku, enti ukai bansa nya empu siruka adat enggau pesaka sida, nadai orang bukai agi dikeandal.

“Bala komiti pengatur pengerami mega setujuka penemu aku tu ngambika diperunding sereta dibai dalam aum ngambika atur tauka pengawa ti patut dipejalai.

“Timbal penemu ari Dato Pete Minos empu manah amat lalu aku temegah ulih bekunsika penemu enggau iya seraya nyaga enggau ngintu pesaka kitai,” ku Iin madah nyemetak.

Ngelansa pasal pengerami nya ti udah dipenyadika Menteri Pelajar, Sains enggau Pansik Teknologi Datuk Sri Michael Manyin Jawong, kaul pupu bansa ti datai kitu ku Iin endang nyata dipeda.

Pengerami tu diatur BBHC bekerejasama enggau Opis Pelilih Bau endang diatur 1 Mei ninting taun lalu tu pengerami keterubah palan nya nerima penatai temuai kena 8 April tu tadi pengudah pengawa ngaga baru infrastruktur dia tembu dipejalai.

PENATAI KITAI… Tanda ngebau padi entara gaya idup dikemeran aki ini bansa Dayak bejeman pengelama.

Entara atur pengerami narit ati sida ke datai kia baka mandangka tanda asal ari raban bansa Dayak Bidayuh, Orang Ulu enggau Iban kelimpah mandangka 15 iku pemekit Pekit Dayung Sangon ti deka bepekit ba renggat kepenudi kena malam 4 Mei tu di Pasar Bau.

Sama datai ngerichahka pengerami 2nd Runner Up Miss Planet International Viviana Lin Winston ti ngemegahka nama menua Sarawak tikas entarabansa.

Lebih 200 iku datai nedat BBHC ti nyendiaka bangsal bejualka pemakai asal, kraf jari enggau produk betanam betupi bukai sereta asi ruas ari berau baru nyadi pematak bala temuai kelimpah ari penyelap angin, pemanah rampa menua asal ti agi diayung kayu kampung.

CHUKUP BAJIK… Iin enda muai peluang begambar enggau 2nd Runner Up Miss Planet International Viviana Lin Winston.

 

TIMPAI KENANG… Iin (bediri, sepuluh kiba) enggau Linda (bediri, tujuh kiba) begambar bebala mayuh ungkup kenang begulai enggau temuai dipebasa, Datuk Sri Michael Manyin (duduk tengah), Datuk Pete Minos (duduk, tiga kiba), raban Adatasal Bidoyoh Sarawak enggau komiti pengatur.