KUCHING: Bantu ngaga rumah panjai baru ba pelilih Repok patut diperundingka piak opis menteri ke bekaul, ku Adun Repok-SUPP, Datuk Seri Huang Tiong Sii.

Iya madah mayuh rumah panjai ba pelilih menua nya udah kelalu lama lalu enda likun alai diau agi.

“Rumah panjai sida nya mega chukup tinggi tau tinggang penusah enda disadang baka bah tauka tanah tusur, lalu patut dipindahka sereta digaga ba alai ti lebih likun.

“Kelimpah ari nya, ungkus dikena ngaga rumah panjai baru begunaka belanja ti mayuh, laban mayuh sida tu datai ari sida ke bekebun mit,” ku iya.

Tiong Sii madah nya rambau bejuraika perambu bekaul enggau jaku TYT Sarawak ba Aum Kaunsil Nengeri (Dun) Hari Ketiga di Dewan Undangan Nengeri (Dun) Sarawak, kemari.

Datuk Seri Huang Tiong Sii

Nangkan nya, iya minta opis menteri ngaga projek bekal ai berubat ba pelilih Sare enggau pelilih Ulu Sarikei.

“Tekat Ai Gerugu ti nyadi penatai bekal ai mata ngaga Loji Ai Beresi Bayong entara palan nyimpan ai ti besai ti ulih meri bekal ai nyau ka selampur menua Wilayah Tengah Sarawak lalu nya mega agi ba dalam pelilih Repok, enda jauh ari menua Ulu Sarikei enggau Sare.

“Taja pia, agi bisi genturung pendiau ba pelilih menua nya agi bedau bulih bekal ai berubat sereta agi bisi ngena ai sungai tauka ai ujan,” ku iya nambah.

Tiong Sii madah entara menua ba Sare enggau Ulu Sarikei ke begunaka projek bekal ai, Rumah Jambing, Rumah Nila, Rumah Endawi,Rumah Sami, Rumah Udol, Rumah Juing sereta menua pelilih nya.

Naka tu,pengawa nasih tanah Projek Jalai Pasi, Sarikei ke Tanjung Manis enggau Projek Jematan Rajang udah mujur dipejalaika Kepala Menteri rambau 6 April tu tadi, lalu projek bukai baka Taman Agropark Sungai Baji ke bisi Palan Ngumpul, Proses enggau Mungkus (CPPC) di ulih ngerichah agi sektor betanam di Sarikei.