KUCHING: Urung 49 bengkah genturung pendiau di pelilih Telang Usan enggau Ulu Baram begunaka servis sereta tiang telekomunikasyen lalu tu nerima perati ari Adun Telang Usan-PBB, Dennis Ngau.

Entara genturung pendiau nya, Long Anap, Long Palai, Long Apu, Ba Abang, Ba Pakan, Apau Gon,Apau Nyaring, Long Kerangan sereta mayuh genturung pendiau ke bukai ba pelilih Telang Usan enggau Ulu Baram.

Kenu ku Dennis, sida udah kala nganjung nama genturung pendiau ke begunaka servis arus penyambung tu lalu ulih digaga tang lalu nadai bisi pemansang pengudah nya.

“Tu nunjukka kurang pengeransing piak pengereja pengawa sereta enda jampat dalam mutarka penanggul ba menua kitai.

“SMA patut beamai-amai dalam ngereja pengawa sida ngambika kompenen pemadu beguna ba pengidup jeman ke-21 tu ulih dipejalaika nyengkaum menua pesisir ba Sarawak tu,” ku iya.

DENNIS NGAU

Iya madah munyi nya maya bejakuka mosyen meri basa nimbal Jaku TYT Sarawak Tun Abdul Taib maya Pengerami Bejadika Aum Dun Ke-18 Renggat Keempat ditu, kemari.

Nangkan nya, Dennis mega mandangka perambu dipinta bala apai indai nembiak ari Rumah Panjai Long Apu Ulu Baram ti minta digagaka perengka guna buding ba Sekolah Rendah Long Apu.

“Tu chukup beguna ngambika bala nembiak ulih terus fokus sereta nerima pelajar ti manah nengah diau ba sekula lebuh hari besekula.

“Nengah buding tu mega ulih beratika bala anak sida tu enda tinggal dalam pelajar laban sida apai indai tu nyaga umai tauka kebun lalu jauh ari rumah panjai,” ku iya nambah.

Dennis madah iya chukup gaga enggau Opis Menteri Pelajar Malaysia enggau Opis Menteri Pelajar enggau Pansik Teknologi laban deka neruska pengawa ngaduka sekula repuk ba menua pesisir Sarawak.