“Kami (perintah) ngasaika pekara pelajar pemadu beguna nya alai kitai tetap mantu sekula China ke pemaik nembiak rebak dudi di Sarawak.”

KUCHING: Perintah Nengeri Sarawak terus ngaku Setipikit Peresa Penuh (UEC) sereta neruska bantu belanja ngagai sekula China di nengeri tu.

Tu berupai nampung polisi ke dipungkal niang Pehin Sri Adenan Satem maya nyadi Kepala Menteri.

Kepala Menteri Datuk Patinggi Abang Johari Tun Openg madah pengawa ngaku UEC endang dikena mantu anak Sarawak ke belajar ba sekula China.

“Kitai deka terus ngaku UEC, enda baka sida ba seberai nyin,” ku iya ngenang sida Perintah Besai ke diiring PH.

BANTU SEKULA…Abang Johari nyuaka replika chek ngagai Vincent Lau rambau Pengawa Nyuaka Geran 2019 ngagai Sekula Sekondari Peribit China di Sekula Sekondari Chung Hua No.1 ditu, kemari.

Iya madah munyi nya maya pengawa Nyuaka Geran 2019 Ngagai Sekula Sekondari Peribit China di Sekula Sekondari Chung Hua No.1 di tu, kemari.

Sarawak endang nengeri ke ngaku peresa peribit China seikas enggau Sijil Tinggi Pelajaran Malaysia (STPM).

Tu ngujungka rayat Sarawak ke ngembuan setipikit nya ulih gawa ba opis perintah di nengeri tu sereta minja pinjau pelajar ari Yayasan Sarawak.

Udah nya ungkup bantu belanja, Abang Johari madah taun tu, perintah Sarawak meri agih penyampau RM11 juta.

Ari penyampau nya, urung RM8 juta diberi ungkup 14 buah sekula sekondari China di Sarawak.

Tu mega ngemataka belanja tambah RM1 juta ari RM7 juta ke diberi taun nyin kemari.

Udah nya, RM3 juta agi ungkup belanja ngaga baru SJK Chung Hua Bako ke dipindah ngagai Taman Berlian, Kota Samarahan begunaka ungkus RM6 juta.

“Kami (perintah) ngasaika pekara pelajar pemadu beguna nya alai kitai tetap mantu sekula China ke pemaik nembiak rebak dudi di Sarawak,” ku iya.

Sama bisi datai Menteri Kaunsil Kandang Menua enggau Pengawa Berumah Datuk Dr Sim Kui Hian, Menteri Muda Dagang temuai, Seni, enggau Main Asal Datuk Lee Kim Shin, Kaban Kunsil Nengeri (Adun) Batu Kitang Lo Khere Chiang, Adun Piasau Datuk Sebastian Ting enggau Chairman Kaunsil Pengatur Gerempung Sekula Peribit China
Sarawak Datuk Vincent Lau Lee Ming.