Hari Kraf Nasional 2019

KRAF jari ditengkebang tukang kraf asal ari Murum enggau Baleh di baruh Program Pemansang Kraf jari enggau Tanggungpengawa Rama Korporat (CSR) Sarawak Energy nerima timbal chukup manah rambau Hari Kraf Nasional 2019 di Kuala Lumpur.

Asil produk kraf jari ti dijual nyauka manggai RM19,000 rambau atur program 12 hari berunggu berengkah ari 28 Febuari nyentuk 11 Mac bepalan di Kompleks Kraf Kuala Lumpur.

Raja Permaisuri Agong Tunku Hajah Azizah Aminah Maimunah Iskandariah Almarhum Sultan Iskandar nyadi temuai dipebasa ba pengawa ngelancharka program nya.

Batang Tuju

TIMPAI JEMAH… Datuk Abdul Karim (tengah) disempulang Datuk John Sikie Tayai (empat kanan) enggau bala bukai begambar ungkup kenang di bangsal kraf ngarika Sarawak rambau Hari Kraf Nasional 2019.

Hari Kraf Nasional 2019 dikena ngaku kaul enggau jasa bala pedagang sereta pengemeran kraf ba pengawa ngemansang enggau ngemajuka industri kraf menua.

Bechuanka penemu Ngenegap Komuniti Kraf, program tu diatur dikena nentuka industri kraf seruran tegap, diintu sereta ulih besemekih setipak enggau penemu nya.

Tukang kraf tu datai ari bala penengkebang, pedagang, pemekal enggau raban ti baru deka ngaul diri.

Inisiatif tu diperati ulih mansutka belanja besai enggau ke bukai ngagai bala komuniti kraf sereta ngemegah enggau ngangkatka komuniti nya.

Rambai jaku ‘Ngemeranka Kraf dalam Gaya Idup’ tu dipilih dikena meransang pengawa bekenaka produk kraf menua tub a pengidup besehari sehari enggau gaya idup kemaya hari.

NGARIKA MENUA… Meron ari Long Malim di Murum enggau Dapong ari Rumah Laso di Baleh mandangka asil kraf seduai ngagai bala pengusung.

Tuju enggau guna produk kraf ba bemacham pekara mungkur pengawa ngelagu dalam rumah enggau laman, ngias diri, penyikap rumah sereta ngerichahka agi pengerami pupu bansa di menua tu.

Juluk Nyadi Nyata

Penatai sida sebuat ngulu program tu nyangka enda nyadi nyata enti nadai sukung ari Sarawak Energy enggau kerejasama Kaunsil Pemansang Krafjari Malaysia (MHDC).

Murum diarika tukang kraf Sheila Bayak, Meron Kulleh enggau Permai Asan ari Long Malim di Tegulang, Murum.

Seraya pengari ari Baleh iya nya Josephine Midong Jubin ari Rumah Nabau, Dapong Sempurai enggau Lily Siba ari Rumah Laso sereta Liban Jinggau ari Rumah Tajai di Ng Antawau, Baleh.

KEMERAH… Tukang kraf ari Baleh kiruh nerang enggau nyaut tanya bala pengusung ti bisi datai ngelawa bangsal sida.

Sida tu dipilih ketegal penyulut enggau pengalus asil tengkebang laban penatai sida mega ngemai nama menua, ngarika bansa asal kitai.

Kelai Sukung

Menteri Dagang Temuai, Seni, Main Asal, Nembiak enggau Lumba Sarawak Datuk Abdul Karim Rahman Hamzah enggau Menteri Muda ba Opis Kepala Menteri (Undang-Undang enggau Adat Bumiputera) Datuk John Sikie Tayai, udah ngelimpangka awak diri ngatur pejalai ngabas bangsal Sarawak Energy ngayanka sukung sida ngagai bala tukang kraf.

Seduai disempulang Jiwari Abdullah, Menijar Besai Kuasa Sarawak ungkup CSR enggau Pekara Meruan sereta Direktor MHDC Sarawak Azran Arip.

Kelimpah ari ngayanka sukung, tuju bukai pejalai tu mega nanggam kaul kerejasama rat begulai enggau bala pengari ejensi bukai ti bela datai mandangka produk ari menua sida empu.

LANDIK JARI… Tukang kraf ari Baleh (ari kiba) Josephine, Lily, Liban enggau Dapong mandangka langkar kraf enggau kain tenu ti tulin ari Sarawak.

Macham bansa produk enggau asil kraf jari bisi dipandang baka tikai, bakul, kantung dianyam ari wi, tangu manik, tumpa, antin sereta ke bukai.

Peluang Makit Entarabansa

Langkar kraf enggau kain sida dipandang begulai enggau produk ari kededua tukang menua tu enggau entarabansa lalu tu nyendiaka pelasar rentayan dagang ngagai sida ti angkunka pengawa tu.

Tukang kraf tu mega nerima pemaik ari penerang dikunsi ti ulih nambahka pengelandik sida betukang sereta ngerembaika makit produk diri.

Reti iya, bala tukang patut ngerebut awak enggau peluang tu beambi ulih ngerembaika chap dagang enggau produk kraf ti nyelai sida ngayankan kelai bansa asal di Sarawak.

PEMESAI MENUA… Raja Permaisuri Agong Tunku Hajah Azizah Aminah Maimunah Iskandariah Almarhum Sultan Iskandar (duduk tengah) nyadi temuai dipebasa Hari Kraf Nasional 2019. – Gambar Portal Rasmi MHDC.

Kitai bela nemu makit entarabansa tu mungkur serap endur, nadai tatak garis entara menua lalu tu manah amat dikena sida belajarka penemu baru, mida kraf ari menua bukai ngambika ulih mekit tauka besemekih.

Ngemansang Kraf Jari

Ngelansa pasal penyereta bala tukang tu ku Jiwari, sida seruran ngiga jalai dikena ngelakuka asil tengkebang menua tu di baruh program ti dipejalai.

“Kami pechaya ari pengawa baka tu setipak enggau tuju deka ngiri enggau ngaluska tengkebang sida ukai semina ba pengelandik kraf aja tang ulih bekunsika penemu enggau runding begulai enggau bala bakih bukai.

“Tu mega ulih ngangkatka chara sida gawa, magi jam diri enggau strategi makit produk laban tu beguna amat enti sida deka ngulihka penatai pemisi ti meruan ari dagang kraf jari,” ku iya madah nyemetak.

PEMILIH… Bala pengusung Hari Kraf Nasional 2019 gagit bebelika produk kraf jari ti bisi dipandang. – Gambar Portal Rasmi MHDC.

Ngembing Tukang Kraf

Sarawak Energy berasai lantang ulih bejalaika pangku pengawa ngemujurka juluk bala tukang ngemai produk sida ngagai tikas tinggi agi.

Gempung korporat tu andal amat ari saup ngelaku enggau ngemansangka dagang kraf ulih ngemai produk asal ditengkebang tukang di Sarawak rembus ba makit entarabansa.

Pengulih besai bala tukang ti ngemeranka pengawa tu mega diperati nyapai juluk menua dekaka peranak mansang dalam dagang kraf.

Tu mega setipak enggau rega puku diperanak ngagai komuniti kitai ti ngangkatka gaya idup enggau pesaka asal sereta pemansang komuniti enggau pengawa dagang.