KUCHING: Sebengkah Komiti Begulai ditumbuhka Perintah Besai enggau Perintah Sarawak dikumbai Kaunsil Gawa.

Kepala Menteri Datuk Patinggi Abang Johari Tun Openg madahka Menteri Besai Tun Dr Mahathir Mohamad udah setujuka Kaunsil Gawa nya bisi chairman begulai.

Ku iya, Sapit Kepala Menteri Datuk Amar Douglas Uggah Embas udah dipadu ngarika Sarawak seraya Menteri Kereja Raya Baru Bian ngarika Perintah Besai.

Kenu ku iya, tuju Kaunsil Gawa deka beratka pengawa enggau pekara pemansang Nengeri Sarawak.

Iya mansutka jaku tu rambau Pengerami Ngenang Jasa Sekretari Perintah Besai Sarawak Datuk Mansor Man malam kemari ti deka pinchin gawa berengkah ari 12 Mei tu pengudah mangku pengawa setaun semilan bulan di nengeri tu.

“Taja timpuh Mansor gawa enda lama tang dalam timpuh tu mayuh amat pemar ditapi iya.

PENGINGAT… Abang Johari nyuaka tepa ngagai Mansor beserimbai enggau Pengerami Ngenang Jasa Sekretari Perintah Besai Sarawak di Kuching, malam kemari.

“Kebuah pia laban bisi ubah ari sukut ngatur pengawa Perintah Besai enggau Perintah Sarawak pengudah PRU Ke-14 taun nyin tadi.

“Tu ukai pekara muntang tang Mansor udah ngemujurka pangku pengawa enggau nyulut amat sepanjai gawa di Sarawak,” ku iya.

Nangkan nya, Abang Johari enggau bala bakih bukai di Perintah Sarawak beterima kasih laban udah ngaul kerejasama ti manah lebuh begulai ngatur pengawa.

“Kitai bekereja ngena chara ti manah lalu kitai gawa pulaika pemaik rayat Sarawak,” ku iya madah nyemetak.

Ngelansa pasal pengawa nyeleti sekula repuk ku Abang Johari, udah bisi chara ti deka ulih ngemujurka tuju pengawa nya.

Nya kebuah pemereti ati entara kededua perintah meseti bisi sereta dipebasa pulaika pengelantang rayat kitai, ku iya nambah.

Pia mega ku iya, kitai ngarapka chara gawa baka tu nyadika lalau orang ti nyilih iya ila ngambika kerejasama kitai meruan bisi.

Seraya Sekretari Perintah Sarawak Tan Sri Datuk Amar Mohamad Morshidi Abdul Ghani madah taja Mansor enda lama mangku pengawa di Sarawak tang iya meretika peminta di Sarawak baka peminta pemansang enggau peneka bala komuniti.

“Mansor mayuh mantu Perintah Sarawak kelebih agi ari sukut kerejasama kaul rat entara Perintah Nengeri enggau Perintah Besai ti meri pemaik ngagai menua kitai,” ku iya nampung.

Mansor diberi awak bejaku madahka diri nadai napi sebarang penanggul lebuh bejalaika pangku pengawa diri ngaul kerejasama begulai enggau raban pengatur pengawa perintah di Sarawak.

“Terima kasih Perintah Sarawak ti udah nyukung enggau meri kerejasama lebuh sepanjai timpuh aku gawa ditu,” ku Mansor.