SARATOK: Juluk peranak Kabong deka meda Sekula Primari (SK) Abang Leman digaga baru nyadi nyata enda lama agi.

Ku MP Saratok Ali Biju, tu projek keterubah dalam Bajet 2019 Perintah Besai ungkup menua Kabong.

“Aku nemu lebih 10 taun udah kita ditu nganti projek tu dipejalai laban sekula tu udah tuai amat, manggai 100 taun udah didiri.

“Diatu projek udah datai ba renggat ditinda laban tinda projek taun nyin tadi enda dikena, nya kebuah kitai mansutka tinda baru,” ku Ali ke mega Adun Krian.

Kebuah pia ku iya, laban bisi ubah ba spefikasyen projek tu ke alai belanja udah ditambah manggai RM51 juta lalu diatu atur pengawa ninda projek benung dipejalai.

GAWAKA RAYAT… Ali bejaku ba mua mayuh ngemai berita manah ari Perintah Besai ngagai peranak di Kabong.

Ali mansutka jaku tu lebuh bejadika Program Kaul Rat Ketuai Begulai Enggau Komuniti Kampung Kabong di Gelanggang Tebuka SJKC Chung Hua, Kabong, pagi tadi.

Ku Ali, dua minggu ke udah bisi raban kunteriktor datai ngabas seraya meda taba ngentak begunan baru sekula nya.

“Aku andal amat pengawa kitai sekali tu deka mujur lalu ulih nangkup peminta penyampau tubuh nembiak ti majak nambah kelimpah nyendiaka penyikap perengka guna pelajar ti meruan agi.

“Aku empu mega deka matau pejalai projek tu laban sedarka projek tu udah lama dianti sida ke diau ditu.

“Dikearap projek tu deka dipejalai nitihka langkar lalu ulih tembu datai ba timpuh ti udah ditetap laban kitai beratka peminta rayat sereta naka ulih nangkup peminta sida,” ku Ali madah nyemetak.

KEMERAH… Ali dibai bejalai meda sekeda ari bansa pemakai ke bisi dibantai rambau Program Kaul Rat Ketuai Begulai Enggau Komuniti Kampung Kabong di Gelanggang Tebuka SJKC Chung Hua, Kabong, pagi kemari.

Ngelansa pasal program nya, Ali madahka temegah ati meda penyerakup pupu bansa ti beserakup ngatur enggau ngemujurka pengawa seraya begulai bebaik enggau pangan diri.

Berebak enggau nya, Ali mega bisi nyuaka pemeri ngagai 151 iku penerima datai ari raban nyelai pendiau enggau nembiak ari ruang bilik seranta lalu program tembu enggau pengawa merarau.

Sama bisi datai Ketuai Opis Polis Kabong Sarjan Lidam, Penulung Penguasa Bomba Pelilih Saratok Nazri Mohamat, Kepala Pengajar SK Abang Leman Moktar Jaya, Chairman Raban Zikir Hadrah Humairah Kabong Hj Sapali Hj Mujit, bala ketuai opis perintah, ketuai raban bansa sereta bala bukai.

PENGASIH… Ali nyuaka pemeri pengasih ngagai siku ari penerima nyerumba atur program kemari.