KUCHING: Sarawak Pay keterubah di Malaysia ngerikod kesemua transaksyen penyampau RM14,199,124.53 naka 28 April taun tu pengudah iya dilanchar dalam taun 2017.

Kepala Menteri Sarawak, Datuk Patinggi Abang Johari Tun Openg mansutka pekara tu lebuh bejadika Pengawa Ngelanchar Sarawak Pay – KK Super Mart di Batu 7, kemari.

“Naka diatu, sepenyampau 68,500 penguna Sarawak Pay udah rejister diri, pedagang (2,400) lalu penyampau kesemua transaksyen bisi dirikod manggai 172,429.

“Sarawak Pay tu bebayar chara moden ti keterubah dipejalai di Malaysia,” ku iya.

Ku iya, rayat Sarawak patut nguji bekenaka chara baru ti dikemansang kelebih agi ba pengawa dagang laban pengawa deka muntang agi sereta jampat mansutka asil.

CHARA MODEN… (Ari kiba) Datuk Dr. Sim Kui Hian, Datuk Patinggi Abang Johari Tun Openg begulai enggau Datuk Seri KK Chai bebayar ngena aplikasyen dalam telefon rambau Pengawa Ngelanchar Sarawak Pay – KK Super Mart di Batu 7, kemari.

“KK Super Mart ngena Sarawak Pay ti udah mujur numbuhka lebih 300 pampang nyadi chunto pengawa ngelakuka Sarawak Pay di selampur Malaysia.

“Kitai semina ngemai telefon aja maya bebelika barang lalu transaksyen ulih digaga tekala nya,” ku iya.

Perintah Sarawak diatu mega benung ngelanggar nempa kaul kerejasama Sarawak Pay enggau Singapo Net lalu udah nyain sempekat enggau Union Pay China dalam bulan April tu tadi.

Ku iya, pengawa kerejasama tu ila deka meri pemaik ngagai temuai ari Malaysia ngagai dua buah menua tu ngaga bayar baka hotel, meli barang enggau mayuh bengkah transaksyen bukai.

Nitih ke penerang Penumbuh enggau Ketuai Pemesai Eksekutif KK Super Mart & Superstore Sdn Bhd, Datuk Seri Dr. KK Chai madah sida berengkah bekenaka aplikasyen digital tu kenyau ari taun 2017.

“Pengudah Sarawak Pay dilanchar, kami mungka pengawa tub a lapan buah kedai KK Mart di Kuching, 12 kedai di Semenanjung Malaysia, sebuah pampang Slimming Sanctuary Beauty Salon enggau sebuah pampang Clara International Beauty Salon di Kuching ditu.

“Kandang sebulan deka datai kami nagit Sarawak Pay tu ulih dikerembai ngagai kesemua 380 kedai KK Super Mart selampur Malaysia sereta anak serikat KK Group ke bukai.

“Tu nyengkaum lima pampang Baiwago Bakery Cafe, empat pampang KK Hotel, KK Kopitiam, KK Food Court, KK Freshmart, KK Motorsport, KK Badminton Court enggau semua pampang Slim Sanctuary Beauty Salon di Semenanjung,” ku iya nerang silik.